नाडा अटोमोबाइल्स एसोसियशन अफ नेपालका अध्यक्ष करण चौधरीले तुरुन्तै निर्वाचन सहितको वार्षिक साधारणसभा बोलाएर पद हस्तान्तरण गर्न तयार रहेको बताएका छन् । कार्यकाल लम्ब्याउनका लागि विशेष साधारणसभा आह्वान गरिएको भन्ने आरोप लागेपछि अध्यक्ष चौधरीले पदमा बसिरहन आफूले कुनै स्वार्थ नराखेको दाबी पनि गरेका छन् ।
एक खण्डन प्रकाशित गर्दै अध्यक्ष चौधरीले भनेका छन्, ‘यस संस्थामाथि उठाइएका सबै भ्रामक दाबीहरूको खण्डन गर्दै पुनः स्पष्ट पार्न चाहन्छु— म पदमा बसिरहन कुनै व्यक्तिगत स्वार्थ राखेको छैन । यदि सबै सरोकारवालाले सहमति जनाउनुभयो भने, म तुरुन्तै निर्वाचन सहितको वार्षिक साधारण सभा बोलाएर पद हस्तान्तरण गर्न तयार छु ।’
उनले जिल्ला प्रशासन कार्यालय काठमाडौँले तोकिएकै मितिमा नाडाको विशेष साधारणसभा गर्नका लागि बाटो खुलाइसकेको समेत दाबी गरेका छन् । नाडाबाट आवश्यक कागजात र स्पष्टीकरण प्राप्त गरेपछि जिल्ला प्रशासन कार्यालयले विशेष साधारणसभा स्थगन गर्न दिएको आदेश फुकुवा गरिसकेको उनको दाबी छ । यस अनुसार अब नाडाको विशष्ो साधारण सभा तोकिएकै मितिमा सम्पन्न हुने समेत उनको भनाइ छ ।
