ललितपुरको ग्वार्को ओभरपास सञ्चालनमा आएपछि त्यस क्षेत्रमा सवारीसाधन जाममा बस्नुपर्ने बाध्यता हटेको छ । अहिले ग्वार्को चोकमा चक्रपथभित्र गुड्ने र सानागाउँ तिरबाट आउने गाडी रोकिँदैनन्, अर्थात् जाममा पर्दैनन् ।
तर, यसको प्रभाव सातदोबाटो तथा कोटेश्वर र एकान्तकुना र वल्खु चोकमा देखिन थालेको जानकारहरु बताउँछन् । सवारी तथा यातायात विज्ञ आशिष गजुरेलका अनुसार ग्वार्को ओमरपास पछि ति क्षेत्रमा सवारी चाप बढेको अनुभव हुन थालेको छ । कारण के ? गजुरेल थप्छन्, ‘चक्रपथ २७ कि.मि. को छ, ग्वार्कोको सवारी व्यवस्थापन क्षमता ओभरपासले वृद्धि गर्यो तर चक्रपथको क्षमता वृद्धि भएन । ग्वार्कोमा सवारी रोकिँदैनन् तर, ति सवारीहरु पूर्व तिर बालकुमारी र कोटेश्वर चोकमा वा पश्चिमतिर सातदोबाटो थुप्रिने भए ।’
उनका अनुसार बालकुमारी, कोटेश्वर वा सातदोबाटो चोकको क्षमता वृद्धि नहुँदा स्वभाविक रुपमा ग्वार्कोको जाम त्यता सरेको हो ।
अब के गर्ने ?
अन्य चोक तथा क्षेत्रमा जाम बढ्यो भनेर सातदोबाटो र एकान्तकुना चोकमा ओभरपास निर्माण गर्ने योजना तत्काल बढाउन उचित नहुने गजुरेलको तर्क छ । किनकी, ग्वार्को ओभरपासको अनुभव अध्ययन गरेर मात्रै आगामी योजना बनाउनु बुद्धिमानीपूर्ण हुने उनको भनाइ छ ।
उनका अनुसार पूर्वाधार थप गरेर मात्रै जाम व्यवस्थापन हुन्छ भन्ने सोच गलत हो । जाम व्यवस्थापन गर्न सडकमा सवारी संख्या कम गर्ने रणनिति बनाउनुपर्छ ।
‘सवारी संख्या कम गर्न सार्वजनिक यातायात सुधार गर्नुपर्छ ता कि मानिसहरु निजी सवारीप्रति कम आकर्षित र सार्वजनिक यातायातप्रति ज्यादा आकर्षित हुन सकुन्’ उनले भने, ‘फ्लाई ओभर वा ओभरपास वा चौडा सडक बनाउँदा उल्पकालिन रूपमा जाम कम हुने हो । दीर्घकालिन समस्याको सामाधान सार्वजनिक यातायातमा राज्यको लगानी हो । यसमा हुईमत नै छैन ।’
उनले सातदोबाटो र एकान्तकुना चोकमा जाम बढेको भएपनि ति क्षेत्रमा अहिले ओभरपास बनाउनतर्फ नलागी ओभरपास वा फ्लाईओभर बनाउने लगानी हाललाई सार्वजनिक यातायात व्यवस्थापनमा उपयोग गर्नु उचित हुने सुझाव पनि दिएका छन् । सार्वजनिक यातायातबाट यातायात प्रणाली सुधार हुने भएकाले यसतर्फ सोच्न आवश्यक रहेको गजुरेलको भनाइ छ ।
