आज २०८१ साउन २७ गते आइतबार नेपालको शेयरबजारमा ३ वटा रेकर्ड बनेको छ ।आज उच्चतम रकमको कारोबारको रेकर्ड, उच्चतम कित्ता शेयर कारोबारको रेकर्ड र उच्चतम बजार पुँजीकरणको रेकर्ड बनेको हो ।
आज शेयर बजारमा २५ अर्ब ७७ करोड ९४ लाख ५३ हजार ५ सय ९ रुपैयाँ ९० पैसाको कारोबार भएको हो । यस अघि २०८१ साउन २२ गते २३ अर्ब ७१ करोडको कारोबार भएको थियो । आज सो रेकर्ड तोडिएको हो। आज शेयर बजार परिसूचक नेप्से भने ९४.५३ अंकले बढेर २८६०.९१ को बिन्दुमा पुगेको छ ।
त्यस्तै आज ६ करोड ३ लाख २१ हजार ३ सय २३ कित्ता शेयर खरिद बिक्री भएको छ। ६ करोड बढी कित्ता शेयर खरिद बिक्री भएको यो नै पहिलो पटक हो ।
त्यस्तै आज बजार पुँजीकरणले पनि नयाँ रेकर्ड कायम गरेको छ। आजको कारोबारपछि बजार पुँजीकरण बढेर ४५ खर्ब ४१ अर्ब ३ करोड ३२ लाख पुगेको छ। यो हालसम्म कै उच्च बजारपुँजीकरण हो ।
आज शेयरबजार परिसूचक नेप्से सूचक ९४.४६ अंकले बढेर २८६०.८४ को बिन्दुमा पुगेर रोकिएको छ । आज हिमालयन रिइन्स्योरेन्सको सर्वाधिक १ अर्ब ५२ करोडको कारोबार भएको छ भने शिवम सिमेन्टको १ अर्ब १६ करोड तथा निफ्राको ६८ करोड २७ लाखको कारोबार भएको छ।
आज कारोबारमा आएका मध्ये ९ कम्पनीको शेयर मूल्य १० प्रतिशतले बढेको छ भने ३ कम्पनीको शेयर मूल्य ९.९९ प्रतिशत बढेको छ। आज कुथेली बुखारी स्मल हाइड्रोको शेयर मूल्य सर्वाधिक १० प्रतिशत घटेको छ भने सिटिजन सुपर ३० म्युचुअल फण्ड ७.५४ प्रतिशत तथा युनिलिभरको शेयर मूल्य ३.५० प्रतिशत घटेको छ ।
