आज बिहिबार पनि नेपाल स्टक एक्सचेन्ज नेप्से पनि बन्द नै रहने छ। नेप्सेका प्रवक्ता मुराहरी पराजुलीले हिजो बुधबार नै बुधबार र बिहिबार नेप्से बन्द हुने सूचना प्रकाशन गरेका थिए ।
हालको विषम परिस्थिति र ब्रोकर तथा लगानीकर्ताबाट पनि कारोबार स्थगन गर्न आग्रह भएकोले बजार बन्द गरिएको नेप्सेले जनाएको छ । यस संगै अब शेयर कारोबार आइतबारदेखि मात्र सुचारु हुने भएको छ। सूचीकरण तथा कारोबार नियमावली, २०७५ को नियम २१ (१) अनुसार कारोबार बन्द गरिएको नेप्सेले जनाएको छ। यस अघि मंगलबार र बुधबार पनि कारोबार बन्द रहेको थियो।
आजबाट सरकार कार्यालय र बैंकहरु भने खुल्ने छन् | काठमाडौँमा कर्फ्यु पनि खुकुलो बनाइएको छ तर समय भने थपिएको छ।
नेपाली सेनाले काठमाडौँ, भक्तपुर र ललितपुरमा निषेधाज्ञा र कर्फ्युको समय बढाएको छ। जस अनुसार यी जिल्लामा भदौ २६ गते बिहान १० बजेदेखि बेलुका ५ बजेसम्म निषेधाज्ञा रहने छ भने भदौ २६ गते बेलुकी ७ बजेदेखि भदौ २७ गते बिहान ७ बजेसम्म कर्फ्यु कायम हुने छ । भदौ २६ गते बिहान ६ बजेदेखि १० बजेसम्म र बेलुकी ५ द्केही ७ बजेसम्म अत्यावश्यक कामको लागि हिड्न सकिने छ।
निषेधाज्ञा तथा कर्फ्यूको दौरान समेत अत्यावश्यक सेवाका ( एम्बुलेन्स, शव वाहन, दमकल, स्वास्थ्यकर्मी, सुरक्षाकर्मी र सञ्चारकर्मीका साथै, खाद्यान्न, इन्धन, दुध, तरकारी, पानी र औषधी ओसारपसार गर्ने) सवारी साधनहरु सञ्चालन गर्न सकिने सेनाले जनाएको छ ।
सेनाका अनुसार विभिन्न सरकारी कार्यालय, बैङ्क तथा वित्तीय संस्था लगायत सार्वजनिक संस्थानहरुमा कार्यरत कर्मचारीहरुले आफ्नो परिचय पत्र देखाई कार्यालयसम्म आवतजावत गर्न सक्नु सक्ने छन् । यस्तै, आन्तरिक तथा अन्तर्राष्ट्रिय उडानका यात्रुहरुले आफ्नो उडानको टिकट देखाई विमानस्थलसम्म आवतजावत गर्न सकिने छ । आवश्यक सहायताको लागि नजिकमा रहेका सुरक्षाकर्मीहरुसँग समन्वय गर्न सेनाले आग्रह गरेको छ ।
काठमाडौं उपत्यका बाहिरको हकमा सम्बन्धित जिल्लाको सुरक्षा परिस्थिति अनुरुप जिल्ला सुरक्षा समितिहरुबाट निर्णय तथा समन्वय गरिएबमोजिम हुनेछ ।
