दरमखोला हाइड्रो इनर्जी लिमिटेडले सर्वसाधारणलाई निष्काशन गरेको आईपीओ साउन २९ गते बाँडफाँड गरेको थियो। सर्वसाधारणलाई आईपीओ बाँडफाँड गरेको २ महिनाभन्दा धेरै अवधि भईसक्दा पनि कम्पनीको शेयर नेपाल स्टक एक्सचेन्ज नेप्सेमा सूचीकृत हुन सकेको छैन।
२ महिना बितीसक्दा पनि कम्पनीको शेयर सूचीकरण भएर कारोबारमा आउन नसक्दा लाखौ लगानीकर्ताको सम्पति बन्धक भएको छ। अझ वैदेशिक रोजगारी कोटामा आईपीओ भरेकाहरुको सम्पति झन् लामो समय बन्धक बनेको छ। दरमखोला मात्र नभई आईपीओ निष्काशन गरेर बाँडफाँड भईसकेका ७ वटा कम्पनीको शेयर सूचीकरण हुन बाँकि छ।
यस्ता छन् आईपीओ बाँडफाँड भएर नेप्सेमा सूचीकृत हुन बाँकि कम्पनीहरु :
१. दरमखोला हाइड्रो इनर्जी लिमिटेड
२. माबीलुङ इनर्जी लिमिटेड
३. स्वस्तिक लघुवित्त
४. बन्दीपुर केवलकार एण्ड टुरिजम लिमिटेड
५. बुङ्गल हाइड्रो लिमिटेड
६. झापा इनर्जी लिमिटेड
७. सागर डिस्टिलरी लिमिटेड
किन भईरहेको छ ढिलाई ?
सिडीएससीले आफ्नो तर्फबाट कुनै ढिलाई नभएको जनाएको छ। शेयर डिम्याट गराउनको लागि सम्झौता भएकाहरुको हकमा शेयर डिम्याट गराएर समबन्धित लगानीकर्ताको डिम्याट खातामा शेयर पठाईसकिएको र बाँकिको हकमा पनि डिम्याट खातामा पठाउने क्रम चलिरहेको सिडीएसले जनाएको छ।
सम्बन्धित कम्पनीहरुले कागजात लैजान ढिलाई गरेको कारण पनि सूचीकरण प्रक्रिया केही ढिलाई भएको देखिन्छ । अन्तिम प्रक्रिया पुरा गरिसकेको हकमा भने नेप्सेमा आन्दोलन चलिरहेकोले शेयर सूचीकरणको लागि ढिलाई भएको बताईएको छ।
दरमखोलाको शेयर रजिष्ट्रार लक्ष्मी सनराइज क्यापिटलका अनुसार दरमखोलाको आईपीओ सूचीकरणको लागि दशैँ लगतै नेप्सेमा कागजात बुझाईएको थियो। तर नेप्सेमा हाल कर्मचारीको आन्दोलन चाहिरहेको छ । शेयर सूचीकरणको लागि नेप्सेको सीइओले नै निर्णय गर्नु पर्ने भएकोले शेयर सूचीकरण हुन नसकेको बताईएको छ।
यदी नेप्सेका कर्मचारीको लागि आन्दोलन तत्काल नसकिए शेयर सूचीकरणको कार्यको लागि अझै धेरै समय लाग्न सक्ने देखिएको छ।
