सिटी होटल लिमिटेडले लिलामीमा ल्याएको हकप्रद शेयर बाँडफाँड भएको छ । बिक्री प्रबन्धक प्रभु क्यापिटलका अनुसार निष्काशनकर्ता कम्पनीको मङ्सिर ११ गतेको संचालक समितिको बैठकले शेयर बाँडफाँड गरेको हो।
क्यापिटलका अनुसार यस लिलामीको शेयरमा कुल २८ सय ६० वटा आवेदन परेका थिए । जसमा कर्मचारीतर्फको शेयरको अन्तिम कटअफ मूल्य ३०६.१० रुपैयाँ, संस्थापकतर्फको शेयरको अन्तिम कटअफ मूल्य २५१ रुपैयाँ र साधारण शेयरतर्फको अन्तिम कट अफ मूल्य ४३६ रुपैयाँ कायम भएको छ। क्यापिटलले हकप्रदमा नपरेको शेयरको रकम आज मङ्सिर १२ गतेदेखि सम्बन्धित शेयरधनीको बैंक खातामा आईपीएस मार्फत फिर्ता गर्ने जनाएको छ ।
कम्पनीले कार्तिक २३ गतेदेखि कार्तिक ३० गतेसम्म हकप्रदमा अवितरित २१ लाख कित्ता बढी शेयर लिलाममा ल्याएको थियो। कम्पनीले हकप्रदमा बिक्री नभएको २१ लाख ५० हजार ४ सय १८ कित्ता हकप्रद शेयर लिलाममा ल्याएको हो।
यी शेयर मध्ये संस्थापक समूहको १९ लाख ८९ हजार ९ सय ९९ कित्ता, कर्मचारी समूहको ६ हजार कित्ता र सर्वसाधारण समूहको १ लाख ५४ हजार ४ सय १९ कित्ता शेयर थिए । जसमा संस्थापक समूहको शेयर र कर्माचारी समूहको शेयर लकइनमा रहेका शेयर हुन् । जसको लक्इन अवधि २०८३ जेठ ४ गतेसम्म रहेको छ ।
कम्पनीले हाल कायम चुक्ता पुँजीको ८० प्रतिशतले हुन आउने १ अर्ब ३३ करोड ९२ लाख रुपैयाँ बराबरको १ करोड ३३ लाख ९२ हजार निष्काशन गरेको थियो। नेपाल धितोपत्र बोर्डले साउन ४ गते सिटी होटेल लिमिटेडलाई हकप्रद निष्काशनको अनुमति दिएको थियो।
