सिटी होटल लिमिटेडले लिलामीमा ल्याएको शेयरको बोलपत्र खोलिएको छ। बिक्री प्रबन्धक प्रभु क्यापिटलले गत शुक्रबार लिलाममा परेका आवेदनको शिलबन्दी बोलपत्रहरु खोलेको हो।
क्यापिटलका अनुसार यस लिलामीको शेयरमा कुल २८ सय ६० वटा आवेदन परेका थिए । जसमा कर्मचारीतर्फको शेयरको प्रारम्भिक कटअफ मूल्य ३०६.१० रुपैयाँ, संस्थापकतर्फको शेयरको प्रारम्भिक कटअफ मूल्य २७६ रुपैयाँ र साधारण शेयरतर्फको प्रारम्भिक कट अफ मूल्य ४६७ रुपैयाँ कायम भएको छ। यद्यपि यो प्रारम्भिक कटअफ मूल्य मात्र रहेको र सबै आवेदन र चेकको भेरिफिकेशनपछि मात्र अन्तिम कटअफ मूल्य तय हुने क्यापिटलले जनाएको छ ।
कम्पनीले कार्तिक २३ गतेदेखि कार्तिक ३० गतेसम्म हकप्रदमा अवितरित २१ लाख कित्ता बढी शेयर लिलाममा ल्याएको थियो। कम्पनीले हकप्रदमा बिक्री नभएको २१ लाख ५० हजार ४ सय १८ कित्ता हकप्रद शेयर लिलाममा ल्याएको हो।
यी शेयर मध्ये संस्थापक समूहको १९ लाख ८९ हजार ९ सय ९९ कित्ता, कर्मचारी समूहको ६ हजार कित्ता र सर्वसाधारण समूहको १ लाख ५४ हजार ४ सय १९ कित्ता शेयर थिए । जसमा संस्थापक समूहको शेयर र कर्माचारी समूहको शेयर लकइनमा रहेका शेयर हुन् । जसको लक्इन अवधि २०८३ जेठ ४ गतेसम्म रहेको छ ।
कम्पनीले हाल कायम चुक्ता पुँजीको ८० प्रतिशतले हुन आउने १ अर्ब ३३ करोड ९२ लाख रुपैयाँ बराबरको १ करोड ३३ लाख ९२ हजार निष्काशन गरेको थियो। नेपाल धितोपत्र बोर्डले साउन ४ गते सिटी होटेल लिमिटेडलाई हकप्रद निष्काशनको अनुमति दिएको थियो।
