रिभर फल्स पावर लिमिटेडले लिलामीमा ल्याएको शेयरको शिलबन्दी बोलपत्रहरु आज सोमबार खोलिने भएको छ। बिक्री प्रबन्धक प्रभु क्यापिटलले आज मङ्सिर ८ गते सोमबार दिउँसो १ बजेदेखि क्यापिटलको कमलादी स्थित कार्यालयमा बोलपत्र खोल्ने जनाएको हो।
कम्पनीले कार्तिक २६ गतेदेखि मङ्सिर ३ गतेसम्म हकप्रदमा अवितरित १० लाख ३८ हजार ९ सय २४ कित्ता हकप्रद शेयर लिलाममा ल्याएको थियो। कम्पनीले यी शेयरको न्युनतम मूल्य १०० रुपैयाँ कायम गरेकोले सो भन्दा बढी मूल्य कबुल गरि आवेदन दिनु पर्ने व्यवस्था थियो। सबै भन्दा बढी मूल्य कबुल गर्नेले शेयर पाउने छ । त्यसपछि पनि शेयर बाँकि रहेमा दोस्रो बढी मूल्य कबुल गर्नेले शेयर पाउने छ । यहि प्रक्रिया अनुसार शेयर बाँकि नरहेसम्म शेयर बाँडफाँड हुने छ।
कम्पनीले भदौ २३ गतेदेखि असोज २६ गतेसम्म १:१ को अनुपातमा हाल कायम चुक्ता पुंजीको १०० प्रतिशतले हुन आउने ७० करोड रुपैयाँको ७० लाख कित्ता हकप्रद शेयर निष्काशन गरेको थियो। हकप्रदमा रितपूर्वक आवेदन दिने ७६ हजार ५ सय १७ जना आवेदकलाई ५९ लाख ६१ हजार ०७६ कित्ता शेयर हकप्रद बाँडफाँड गरिएको थियो। यस संगै बिक्री नभएको १० लाख ३८ हजार ९ सय २४ कित्ता शेयर लिलाममा आएको हो।
नेपाल धितोपत्र बोर्डले साउन ९ गते कम्पनीलाई हकप्रद निष्काशनको अनुमति दिएको थियो।
