दुई वटा बीमा कम्पनीले हकप्रद निष्काशनको अनुमति माग गर्दै नेपाल धितोपत्र बोर्डमा आवेदन दिएका छन्। एशियन लाइफ इन्स्योरेन्स र प्रभु इन्स्योरेन्सले बोर्डमा आवेदन दिएका हुन् ।
एशियन लाइफ इन्स्योरेन्सले जेठ २३ गते र प्रभु इन्स्योरेन्सले असार १९ गते बोर्डमा आवेदन दिएको हो । एशियन लाइफले हाल कायम चुक्ता पुँजीको १:०.४२ अनुपातमा ४२ प्रतिशत हकप्रद शेयर र प्रभु इन्स्योरेन्सले १:०.५०१५ को अनुपातमा ५०.१५ प्रतिशत हकप्रद शेयर निष्काशनको अनुमति माग गरेको हो ।
बोर्डबाट अनुमति पाएपछि एशियन लाइफले १ करोड ४२ लाख ७९ हजार ३ सय १२ दशमलव ४८ कित्ता हकप्रद शेयर र प्रभु इन्स्योरेन्सले ८३ लाख ५० हजार १ सय ३५ दशमलव ४४ कित्ता हकप्रद शेयर निष्काशन गर्ने छ । शेयर निष्काशनको लागि एशियन लाइफले मुक्तिनाथ क्यापिटल र प्रभु इन्स्योरेन्सले एनआईसी एशिया क्यापिटललाई बिक्री प्रबन्धक चयन गरेको छ ।
यी बाहेक एनएलजी इन्स्योरेन्स, प्रभु महालक्ष्मी लाइफ इन्स्योरेन्स, नेको इन्स्योरेन्स, र लाइफ इन्स्योरेन्स कर्पोरेशन नेपालले यस अघि नै हकप्रद निष्काशनको लागि बोर्डमा आवेदन दिइसकेका छन् ।
