हिमालयन लाईफ इन्स्योरेन्सले व्यतित बीमालेखमा लाग्ने बिलम्व शुल्क (ब्याज/ जरिवाना) मा छुट दिने भएको छ । साविकको प्राइम लाइफ इन्स्योरेन्स, यूनियन लाइफ इन्स्योरेन्स, र गुराँस लाइफ इन्स्योरेन्सबाट विभिन्न मितिमा बीमा गराई व्यतित (Lapse) भएका बीमालेखहरुमा कम्पनीले छुट दिने भएको हो ।
कम्पनीका अनुसार २०८१ आषाढ ६ गतेदेखि २३ गते सम्ममा त्यस्ता व्यतित बीमालेख नविकरण/पुनर्जागरण गर्दा बीमाशुल्कमा लाग्ने बिलम्व शूल्क (ब्याज / जरीवाना) मा छुट प्रदान गरिने छ । ३ बर्ष सम्म व्यातित बीमालेखमा ब्याज/ जरीवानामा शत्प्रतिशत छुट, ३ बर्ष माथि देखि ५ बर्ष सम्म व्यतित बीमालेखमा ब्याज/ जरीवानामा ५० प्रतिशत छुट,
५ बर्ष माथि देखि ७ बर्ष सम्मको व्यतित बीमालेखको ब्याज/जरीवानामा ३५ प्रतिशत छुट तथा ७ बर्ष माथि देखि जतिसुकै अवधिको व्यतित बीमालेखमा ब्याज/जरीवानामा २५ प्रतिशत छुट प्रदान गरिने कम्पनीले जनाएको छ ।
यस किसिमको व्यतित बीमालेख पूनर्जागरण गर्दा दिइएको छुट सुविधा बीमा अवधिभर एकपटक मात्र प्रदान गरिने कम्पनीले प्रष्ट पारेको छ । कम्पनीबाट ब्याज/जरीवाना छुट सुविधाको उपयोग गरी नविकरण गराईएका बीमालेखहरु बीमालेख नविकरण भएको मितिले दुई बर्ष भित्र बीमित तथा प्रस्तावकहरुले नियमानुसार समर्पण ( Surrender) गर्न चाहेमा बीमालेख नविकरण गर्दा छुट प्रदान गरिएको ब्याज / जरीवाना वापतको रकम कम्पनीबाट कट्टा गरिने कम्पनीले उल्लेख गरेको छ ।
व्यतित भएको बीमालेखले बीमा जोखिम बहन नगर्ने हुँदा समयमा नै आफ्नो बीमालेखको नवीकरण बीमाशुल्क भुक्तानी गरी ब्याज र जरीवाना छुटको लाभ लिनुका साथै बीमालेख अनुरुपको जोखिम बहन हुने ब्यवस्था गरी ढुक्क हुन कम्पनीले अनुरोध गरेको छ । यस सम्बन्धमा थप जानकारीको लागि यस कम्पनीको आफुलाई पायक पर्ने कुनै पनि प्रादेशिक / शाखा / उप-शाखा कार्यालयहरुमा सम्पर्क राख्नु सकिने कम्पनीले उल्लेख गरेको छ ।
