३ करोड रुपैयाँभन्दा माथिको थैली रकम भएका घरजग्गा कारोबार अब कम्पनीमार्फत मात्रै गर्नुपर्ने भएको छ । भूमि व्यवस्था तथा अभिलेख विभागले ३ करोडभन्दा माथिका घरजग्गा किनबेच गर्दा अनुमति प्राप्त कम्पनीमार्फत मात्रै गर्नुपर्ने प्रावधान कार्यान्वयनमा ल्याएको हो ।
सोमबार सूचना जारी गर्दै विभागले मंगलबारबाटै यो प्रावधान कार्यान्वयनमा ल्याएको हो । घरजग्गाको कारोबारलाई विचौलियामुक्त बनाउने अभियान अन्तर्गत विभागले कम्पनीमार्फत कारोबार गर्नुपर्ने प्रावधान कार्यान्वयनमा ल्याएको हो ।
विभागले घरजग्गा कारोबारको लाइसेन्स लिएका कम्पनीहरुको नामसमेत सार्वजनिक गरेको छ । कुल ६९ वटा कम्पनीले इजाजात पाएका छन । यीमध्ये ४ वटा कम्पनीले भू–सेवा केन्द्र सञ्चालनको समेत अनुमति पाइसकेका छन् । बाँकी प्रक्रियामा छन् ।
कुन कुन मालपोतबाट अनिवार्य भयो कम्पनीमार्फत कारोबार ?
भूमी व्यवस्थापन विभागले हाललाई महानगरपालिका र उपमहानगरपालिकामा कम्पनीमार्फत कारोबार अनिवार्य गरेको छ । मालोपात कार्यालयतर्फ काठमाडौँका कलंकी र चाबहिल, सुनसरीको धरान, बाराको सिमरा, मकवानपुरको हेटौंडा, चितवनको भरतपुर र चनौली, कास्कीका पोखरा र लेखनाथ, दाङको तुल्सीपुर, रुपन्देहीको बुटवल मालपोतमा अनिवार्य गरिएको छ ।
यस्तै, भूमीसुधार तथा मालपोत कार्यालयतर्फ काठमाडौँको डिल्लीबजार, ललितपुरको लगनखेल, मोरङको विराटनगर, सुनसरीको इनरुवा, पर्साको वीरगन्ज, बाराको कलैया, धनुषाको जनकपुरधाम, बाँकेको नेपालगन्ज, दाङको घोराही र कैलालीको धनगढीमा पनि परिपत्र गर्दै विभागले यो प्रावधान अनिवार्य गराएको छ ।
यस्तो छ विभागको परिपत्रः
