उपभोक्ताले सहजै ग्यास नपाएको गुनासो गर्न थालेपछि नेपाल आयल निगम आफैँले ग्यास बिक्री वितरणको व्यवस्था मिलाएको छ । निगमले काठमाडौँ उपत्यकामा ग्यासको माग बढी रहेको र उपभोक्ताले सहजै नपाएको गुनासो बढेपछि शनिबारबाट आफ्नै कार्यालयबाट ग्यास बिक्री वितरण गर्न लागिएको जनाएको हो ।
निगमका अनुसार साउन १६ गतेदेखि टेकुस्थित कार्यालयबाट विभिन्न कम्पनीका ग्यास बिक्री गरिनेछ । नेपाल ग्यास, एचपी ग्यास, एभरेस्ट ग्यास, सुगम ग्यास र श्रीराम ग्यासका सिलिन्डर बिक्री वितरण गरिनेछ ।
निगमको कार्यालयमा बिहान ११ बजेदेखि साँझ ५ बजेसम्म ग्यास पाइनेछ ।
यदि, ग्यास नपाएको अवस्थामा कार्यालय समयभित्र सम्पर्क गर्न पनि निगमले अनुरोध गरेको छ । निगमले हटलाइन नम्बर (०१–५९७१९०२) पनि सार्वजनिक गरेको छ ।
