नेपाल उद्योग वाणिज्य महासंघको कोषाध्यक्ष पदमा अम्बिका प्रसाद पौडेलले उम्मेदवारी घोषणा गरेका छन् । शुक्रबार हुन लागेको निर्वाचनका लागि उनले उम्मेदवारी घोषणा गरेका हुन् ।
पौडेलले व्यक्तिगत आकांक्षा वा पद प्राप्तीको उद्देश्यले नभई व्यवसायी समुदायको साझा भावना, संस्थागत विकास प्रतिको प्रतिवद्धता तथा महासंघलाई अझ सक्षम, प्रभावकारी, बिधि र बिधान अनुसार अघि बढाउन र सबैको अपनत्व भएको संस्था बनाउने संकल्पका साथ आफू अघि बढेको उल्लेख गरेका छन् ।
उनले महासंघमा कार्यकारी सदस्यका रूपमा अहिले आफ्नो तेस्रो कार्यकाल रहेको र यसअघि पूँजी बजार फोरम तथा कर तथा राजस्व समितिको सभापतिको जिम्मेवारी निर्वाह गरिसकेको पनि बताएका छन् । ती भूमिकामा रहँदा व्यवसायीका आवाज सरकारसम्म पुर्याउने, कर तथा राजस्वसम्बन्धी जटिलताहरू समाधानका लागि पहल गर्ने, कर, भन्सार, अन्तशुल्क लगायतका कानुनका व्यवहारिक समस्याहरू उठान गर्ने तथा निजी क्षेत्रका हितका पक्षमा निरन्तर संवाद र सहकार्य गर्ने प्रयास गर्दै आएको पौडेलले उल्लेख गरेका छन् ।
महासंघको वरिष्ठ उपाध्यक्ष र कोषाध्यक्ष पदको निर्वाचन शुक्रबार हुँदैछ ।
