नेपाल उद्योग वाणिज्य महासंघले महिला उपाध्यक्ष नपाउने पक्का भएको छ । विधानमा केन्द्रीय कार्यकारिणी समितिमा १२ जना महिला पुगेपछि एक जना उपाध्यक्ष हुने प्रावधान छ । तर, मंगलबार भएको निर्वाचनबाट पर्याप्त संख्यामा महिलाहरु निर्वाचित हुन सकेनन् ।
विधानको दफा २९ को उपदफा २९.७ मा ‘महिला उपाध्यक्ष सम्पूर्ण कार्यकारिणी समिति मध्येबाट निर्वाचित हुनेछ । दुइ कार्यकाल सदस्य भइसकेको बहालवाला सदस्य मात्र उक्त पदमा उम्मेदवार बन्न सक्नेछ । कार्यकारिणी समितिमा कम्तीमा बाह्र जना महिला सदस्य भएमा मात्र महिला उपाध्यक्ष एकजना हुनेछ’ भनिएको छ ।
तर, यसपाली जम्मा ६ जना महिलाहरु मात्रै निर्वाचित भएका छन् । जिल्ला नगर तर्फको महिला कोटाबाट गीता अमात्य (नुवाकोट) र हिरा भट्टराई (पोखरा) निर्वाचित भएका छन् ।
यसअघिः
उद्योग वाणिज्य महासंघले ‘महिला उपाध्यक्ष’ पाउने सम्भावना अत्यन्त कम
यस्तै, वस्तुगत तर्फको महिला कोटाबाट कृषि मेशिनरी व्यवसायी संघकी सुनिता न्हेम्हाफुकी निर्वाचित भएकी छिन् । उनले हेमराज ढकाल समूहबाट महिला उपाध्यक्षको उम्मेदवारका रुपमा प्रस्तावित कमला श्रेष्ठलाई नै पराजित गरेकी हुन् ।
यसैगरी, वस्तुगत महासंघको खुलातर्फ उम्मेदवारी दिएकी क्यान महासंघकी सुनैना घिमिरे निर्वाचित भएकी छिन् ।
एसोसियट तर्फको महिला कोटाबाट बुकिङ वेज नेपाल प्रा.लि.की अभिज्ञा मल्ल र सेवा सेक्युरिटिज प्रा.लि.की जुना माथेमा निर्वाचित भएका छन् ।
अब अध्यक्षले ७ जनालाई केन्द्रीय सदस्यमा मनोनित गर्दा अनिवार्य रुपमा दुइ जना महिलालाई मनोनित गर्नुपर्नेछ । मनोनितबाट दुइ जना थपिँदा पनि केन्द्रीय कार्यकारिणी समितिमा महिला सदस्य जम्मा ८ जना मात्रै हुनेछन् । यसकारण यसपाली महासंघले महिला उपाध्यक्ष नपाउने भएको हो ।
