विद्युत नियमन आयोगका नवनियुक्त अध्यक्ष डा. राम प्रसाद धितालले आफ्नो ३ वटा प्राथमिकता रहेको बताएका छन् । आज नियमन आयोगमा पदभार कार्यक्रममा उनले कर्मचारीलाई निर्देशन र मार्गदर्शन गर्दै उनले आयोगलाई थप विश्वसनीय बनाउन ३ वटा प्राथमिकता तय गरेको बताएका हुन् ।
उनले आफ्नो पहिलो प्राथमिकता आयोगलाई थप संस्थागत गर्ने रहेको बताए । डा. धितालले यस अघिको कार्यकालमा आयोगलाई संथागत बनाउन काम थालेका थिए। उनकै पालामा आयोगले पहिलो पटक आफ्नै स्थायी कर्मचारी नियुक्त गरेर काम थालेको थियो। आयोगको आफ्नै प्रशासनिक विनियमावली, आफ्नै आर्थिक विनियमावली,आफ्नै खरिद विनियमावली, आफ्नै निर्णय प्रक्रियाको मोडल निर्माणको काम उनी अध्यक्ष हुँदा नै भएका थिए। आयोगलाई संस्थागत बनाउनको लागि अधुरा रहेका काम अब अघि बढ्ने उनले बताए ।
त्यस्तै उनले दोस्रो प्राथमिकतामा आयोगले निर्माण गरिसकेका विभिन्न नियामकीय व्यवस्थाको कार्यान्वयन रहेको बताए। ओपन एक्सेस लगायतका व्यवस्थाहरु कार्यान्वयनमा लैजाने उनले बताए ।
त्यस्तै उनले सरकारले विभिन्न प्रकारका रिफर्म गर्न खोजेको र सोहि अनुसार आयोगले ‘रेगुलेटोरी रिफर्म’ मा अघि बढ्ने बताए। अघिल्लो कार्यकालमा नियुक्ति हुँदाको भन्दा अहिलेको म्याण्डेट केही फरक रहेकोले सोहि अनुसार कार्य गर्ने उनको भनाई थियो। उनले केही दिन भित्रै नतिजा देखिने गरि कामहरु गर्ने प्रतिवद्दता पनि जनाएका छन् । नेपाल धितोपत्र बोर्डसँग समन्वय गरेर अगाडि बढ्ने पनि उनले बताएका छन् ।
आज नै आयोगका नव नियुक्त सदस्यहरु लोकराज पाठक, जयराम भण्डारी र बलराम सिलवालले पनि पदभार ग्रहण गरेका छन्।
