विद्युत नियमन आयोगको अध्यक्षमा डा. राम प्रसाद धिताल नियुक्त भएका छन् । मन्त्रिपरिषद्को हिजो बुधबार बसेको बैठकले डा. धिताललाई अध्यक्षमा नियुक्त गर्ने निर्णय गरेको हो।
उनको सपथ र पदभार कार्यक्रम आज नै हुने बताईएको छ। डा. धिताल यस अघि पनि आयोगको अध्यक्ष थिए। सरकारले ल्याएको अध्यादेशको कारण उनी पदमुक्त भएका थिए । अब फेरी उनी अध्यक्षमै फर्किएका हुन् ।
यस अघि उनी अध्यक्ष हुँदा आयोगलाई संथागत बनाउन काम गरेका थिए। उनकै पालामा आयोगले पहिलो पटक आफ्नै स्थायी कर्मचारी नियुक्त गरेर काम थालेको थियो। आयोगको आफ्नै प्रशासनिक विनियमावली, आफ्नै आर्थिक विनियमावली,आफ्नै खरिद विनियमावली, आफ्नै निर्णय प्रक्रियाको मोडल निर्माणको काम उनी अध्यक्ष हुँदा नै भएका थिए। उनीसँग नेपालो र विदेशमा गरि जलविद्युत, सोलार ऊर्जा, ग्रामिण विद्युतीकरण, नवीकरणीय उर्जामा झन्डै ३० वर्षको अनुभव रहेको छ। उनले एशियाली विकास बैंकको लागि पनि विज्ञ सदस्यको रुपमा काम गरिसकेका छन् ।
उनले जर्मनीबाट नवीकरणीय उर्जामा मास्टर्स गरेका हुन् भने त्रिभुवन विश्वविद्यालयबाट नवीकरणीय उर्जामै पीएचडी गरेका छन् ।
