नेपाल नागरिक उड्डयन प्राधिकरणले जेष्ठ नागरिकहरुलाई हवाई यात्रामा विशेष छुट दिने व्यवस्था गरेको छ । प्राधिकरणका महानिर्देशक प्रदीप अधिकारीको अध्यक्षतामा वायुसेवा सञ्चालक संघका अध्यक्षसहित आन्तरिक हवाई कम्पनीका प्रतिनिधिहरु समेतको उपस्थितिमा बसेको बैठकले जेष्ठ नागरिकहरुलाई हवाई यात्रामा अधिकतम् छुट उपलब्ध गराउने सहमति गरेको हो ।
यस अनुसार ७० वर्षभन्दा माथि उमेरका जेष्ठ नागरिकहरुले हवाई यात्रामा सरकारले तोकेको अधिकतम् भाडामा ५० प्रतिशत छुट पाउने छन् । यस्तै, ७५ वर्षभन्दा माथिका जेष्ठ नागरिकले हवाई भाडामा ७० प्रतिशत छुट पाउने छन् ।
यस्तै, ८० वर्षभन्दा माथिका जेष्ठ नागरिकहरुलाई भने हवाई यात्रामा ८० प्रतिशत छुट दिने निर्णय भएको महानिर्देशक अधिकारीले जानकारी दिए ।
उनका अनुसार जुनसुकै उमेर समूहको भएपनि फरक क्षमता भएका हवाई यात्रुलाई ५० प्रतिशत छुट सुविधा उपलब्ध गराइने भएको छ । यो निर्णय आजकै मितिबाट लागू हुने गरी सूचना नै प्रकाशित गरिसकिएको महानिर्देशक अधिकारीले जानकारी दिएका छन् ।
