नेपाल रिकण्डिशन अटो व्यवसायी संघले यातायात व्यवस्था कार्यालय एकान्तकुनाका कार्यालय प्रमुख हरिहर पोखरेलसँग भेट गरी यातायात प्रशासनसँग सम्बन्धित समस्याबारे छलफल गरेको छ । संघका अध्यक्ष रमेश कोइरालाको नेतृत्वमा गएको संघको प्रतिनिधिमण्डलले प्रमुख पोखरेलसँग यातायात कार्यालयमा पार्किङको असुविधा भएको र भेहिकल रजिष्ट्रेशन सिस्टम (भीआरएस)मा भएको अवरोध हटाउने लगायतका विषयमा छलफल गरेको हो ।
साउन २५ गतेदेखि भीआरएस प्रणाली अवरुद्द हुँदा सवारीको दर्ता प्रक्रियामै अवरोध भएपछि संघले यसबारे यातायात व्यवस्था कार्यालय एकान्तकुनाका प्रमुख पोखरेलसँग छलफल गरि समस्या समाधान गर्न आग्रह गरेको हो । संघले यस सम्बन्धमा कार्यालय प्रमुखसँग छलफल गरे लगत्तै अहिले यो सेवा सूचना भइसकेको जानकारी आएको छ ।
सँगै, यातायात कार्यालय परिसरमा पार्किङको सुविधा नहुँदा सेवाग्राहीलाई मर्का परिरहेको भन्दै संघले कार्यालयको ध्यानाकर्षण गराएको छ । पार्किङको समस्या समाधान गर्न यातायात व्यवस्था कार्यालयले माथिल्लो निकायसँग समन्वय गरी यो समस्या तत्काल हल गर्ने समझदारी बनेको संघले बताएको छ ।
यसैगरी, पार्किङको समस्या समाधान गर्न नेपाल रिकण्डिशन अटो व्यवसायी संघले यातायात व्यवस्था कार्यालय वरिपरी प्रयोगयोग्य जग्गा भए त्यस्तो जग्गाको पहिचान गर्ने र त्यसलाई पार्किङमा उपयोग सकिने विषयमा यातायात व्यवस्था कार्यालयलाई जानकारी गराउने समझदारी बनेको संघका अध्यक्ष कोइरालाले जानकारी दिएका छन् ।
यातायात कार्यालय एकान्तकुनाका प्रमुखलाई भेट्न गएको संघको टोलीमा अध्यक्ष कोइरालासहित महासचिव कुमार बोगटी, कार्यसमिति सदस्य मनिषराज पाण्डे र सल्लाहकार नविन थापा सहभागी थिए । उनीहरुको साथमा प्रतिनिधिसभा सदस्य प्रतिक्षा तिवारी पनि सहभागी थिइन् ।
