सरकारले बजेटमार्फत विद्युतीय सवारीको कर प्रणालीलाई मूल्यमा आधारित बनाएपछि नेपालमा ईभी आयात गर्ने कम्पनीहरुले धमाधम मूल्य समायोजन गर्न थालेका छन् । हालसम्म ५ वटा ब्राण्डका आयातकर्ता कम्पनीले मूल्य समायोजनको सूचना प्रकाशित गरेका छन् ।
जस अनुसार एमजीको आयातकर्ता पारामाउण्ट मोटर्सले एमजी एस६ को मूल्य ६९ लाख ९९ हजार रुपैयाँबाट ७२ लाख ९९ रुपैयाँ पु¥याएको छ । यस मोडलमा ३ लाख रुपैयाँ मूल्य बढेको छ ।
यसैगरी, एसपीजी अटोले आईकार भी–२३ को मूल्य ५० लाख ९९ हजार रुपैयाँबाट ५३ लाख ९९ हजार कायम गरेको छ । कम्पनीले यस मोडलको मूल्य ३ लाखले नै बढाएको छ । यस्तै, जे६ टी को मूल्य पनि ६८ लाख ९९ हजारबाट ६९ लाख ९९ हजार कायम गरिएको छ । कम्पनीले यस मोडलको मूल्य १ लाखले बढाएको छ ।
यस्तै, जीली ईभीको आयातकर्ता एलआरआर मोटर्सले इएक्स५ म्याक्सको मूल्य ३ लाखले बढाउँदै ७० लाखबाट ७३ लाख कायम गरेको छ । जीली इएक्स५ प्रो को मूल्य भने कम्पनीले २ लाख रुपैयाँ बढाएर ६० लाखबाट ६२ लाख कायम गरिएको जनाएको छ ।
यसैगरी, लीपमोटर ‘बी १०’ एसयूभीको मूल्य भने एकैपटक ५ लाख रुपैयाँले घटेको छ । सांग्रिला मोटर्सले बी १० को मूल्य ५९ लाख ९९ हजारबाट ५४ लाख ९९ हजार ९९९ रुपैयाँ तोकेको छ ।
यसअघि ईभीको आयातमा किलोवाटको आधारमा लाग्दै आएको करलाई अर्थमन्त्री डा. स्वर्णिम वाग्लेले अन्तःशुल्क खारेज गरेर मूल्यका आधारमा स्वच्छ पूर्वाधार लगानी शुल्क लाग्ने व्यवस्था गरेका हुन् । जस अनुसार २० लाखसम्म भन्सार मूल्य भएका विद्युतीय सवारी साधनमा २.५ प्रतिशत, २० लाखदेखि ३० लाखसम्म भन्सार मूल्य भएका सवारी साधनमा २० प्रतिशत र ३० लाखदेखि ४० लाखसम्म भन्सार मूल्य भएका सवारी साधनमा ३५ प्रतिशत स्वच्छ पूर्वाधार लगानी शुल्क लाग्ने छ ।
यस्तै, ४० लाखदेखि ५० लाखसम्म भन्सार मूल्य भएका ईभीमा ९० प्रतिशत र ५० लाखभन्दा बढी भन्सार मूल्य भएका सवारी साधनमा १३० प्रतिशत यस्तो शुल्क लाग्ने व्यवस्था गरिएको छ ।
