आज शुक्रबार ल्याउने तयारी भएको मौद्रिक नीति आज सार्वजनिक नहुने भएको छ । मौद्रिक नीति पारित गर्न आज बिहान राष्ट्र बैंक सञ्चालक समितिको बैठक बोलाइएको भएपनि तयारी नपुगेको भन्दै आजको बैठकबाट मौद्रिक नीति सम्बन्धि एजेण्डा हटाइएको स्रोतले बताएको छ ।
यसअघि गर्भनर महाप्रसाद अधिकारीले अर्थमन्त्री विष्णु पौडेललाई समेत मौद्रिक नीतिबारे ‘ब्रिफिङ’ गरिसकेका थिए । यस लगत्तै आजै सञ्चालक समितिबाट पारित गरेर दिउँसो सार्वजनिक गर्ने तयारी थियो ।
तर, प्रधानमन्त्री केपी शर्मा ओलीले आफ्नो प्रमुख आर्थिक सल्लाहकारमा पूर्व अर्थमन्त्री डा. युवराज खतिवडालाई नियुक्त गरेपछि उनलाई पनि ‘ब्रिफिङ’ गर्नुपर्ने भएकाले आज मौद्रिक नीति आउने सम्भावना टरेको बताइएको छ ।
