नेपाल उद्योग वाणिज्य महासंघका अध्यक्ष चन्द्रप्रसाद ढकालले राष्ट्र बैंकले सार्वजनिक गरेको मौद्रिक नीतिले संकुचनबाट बजारलाई बाहिर ल्याउने प्रयत्न गरेको बताएका छन् । राष्ट्र बैंकले मौद्रिक नीति सार्वजनिक गरे लगत्तै प्रारम्भिक प्रतिक्रिया दिँदै उनले केन्द्रीय बैंकले मौद्रिक नीतिमार्फत बजारमा देखिएका समस्यालाई सम्बोधन गर्ने प्रयत्न गरेको बताएका हुन् ।
उनले मौद्रिक नीति सार्वजनिक भएपनि यस सम्बन्धित धेरैजसो व्यवस्था एकिकृत निर्देशन र निर्देशिकाबाट आउने भन्दै आज सार्वजनिक मौद्रिक नीतिको भाव भने लचिलो र बजार माग बढाउने खालकै देखिएको बताए ।
निजी क्षेत्रमा १२.५ प्रतिशतको कर्जा विस्तार, असल ऋणमा प्रोभिजनको व्यवस्था १.२ प्रतिशतबाट १.१ प्रतिशत कायम, ब्याजदर करिडोरको माथिल्लो सीमाको बैंकदर ७ प्रतिशतबाट ६.५ प्रतिशत र नीतिगत दर ५.५ प्रतिशतबाट ५ प्रतिशत कायम हुनु स्वागतयोग्य भएको अध्यक्ष ढकालको भनाइ छ ।
यस्तै, निर्माण व्यवसायहरूलाई प्रवाह भएको कर्जाको साँवाब्याज तिर्ने अवधि २०८१ मंसिर मसान्तसम्म थप भएको र निर्माण व्यवसायहरूलाई चेक अनादर भएकै आधारमा मात्र कालोसूचीमा समावेश नगरिने विषय निजी क्षेत्रको माग अनुसार नै आएको उनले उल्लेख गरेका छन् ।
सेयर बजार तथा घरजग्गा कारोबारलाई पनि सम्बोधन गर्ने प्रयत्न गरेको भन्दै मौद्रिक नीति समग्रमा सकारात्मक नै मान्नुपर्ने बताएका छन् ।
