दूधपोखरी चेपे हाइड्रोपावर लिमिटेडले (प्राथमिक शेयर) आईपीओ निष्काशन गर्ने भएको छ । यसका लागि कम्पनीले मुक्तिनाथ क्यापिटललाई बिक्री प्रबन्धकमा नियुक्ति गरेको छ ।
बिक्री प्रबन्धक नियुक्ति भएपछि मुक्तिनाथ क्यापिटलले दूधपोखरी चेपे हाइड्रोपावरको आईपीओ निष्काशन तथा बिक्री प्रबन्धकको रूपमा कार्य गर्नेछ । सम्झौतामा दूधपोखरी चेपे हाइड्रोपावरका तर्फबाट अध्यक्ष सबिन प्रधानाङ्गले र मुक्तिनाथ क्यापिटलका तर्फबाट प्रमुख कार्यकारी अधिकृत कविन्द्र ध्वज जोशीले हस्ताक्षर गरेका छन् ।
दूधपोखरी चेपे हाइड्रोपावर लिमिटेडले गोरखा र लमजुङ जिल्लाको सिमानामा पर्ने चेपे खोलामा ११ मे.वा. क्षमताको आयोजना निर्माण गरिरहेको छ । कम्पनीले २०७४ कात्र्तिकमा विद्युत विकास विभागबाट विद्युत् उत्पादन सर्वेक्षण अनुमति प्राप्त गरी २०७५ मंसिरमा नेपाल विद्युत् प्राधिकरणसँग ग्रिड कनेक्शन सम्झौता र २०७५ पुषमा विद्युत् खरिद सम्झौता सम्पन्न गरिसकेको छ ।
हाल सम्म आयोजनाको ७८ प्रतिशत कार्य सकेको र बाँकी कार्य २०८२ चैत्र महिनाको अन्त्य सम्ममा सम्पन्न गर्ने लक्ष्य लिएको छ ।
कम्पनीले आयोजना निर्माणको कार्य अन्तिम चरणमा रहेकाले आफ्नो जारी पूँजीको २० प्रतिशत प्रतिशतले हुन आउने अर्थात् २० करोड २० लाख रकम बराबरको १ सय रुपैयाँ अङ्कित दरमा २० लाख २० हजार कित्ता साधारण शेयर निष्काशन गर्न लागेको छ ।
