नेपालीको पहिचान, गौरव र शानका रूपमा स्थापित परम्परागत नेपाली खुकुरी बनाउने सीप तथा व्यवसायको संरक्षणमा वल्र्डलिंक कम्युनिकेसन्स लिमिटेडले सहयोग गरेको छ ।
सल्यानको खलङ्गास्थित विश्वकर्मा टोलमा परम्परागत रूपमा खुकुरी निर्माण गर्दै आएका राजु विक र पार्वती विकलाई वल्र्डलिंकले संस्थागत सामाजिक उत्तरदायित्व अन्तर्गत सुरक्षित टहरा निर्माण गरी हस्तान्तरण गरेको हो ।
परम्परागत सीप र व्यवसायको संरक्षणसँगै स्थानीयस्तरमा स्वरोजगार तथा आयआर्जनका अवसरलाई निरन्तरता दिने उद्देश्यले निर्माण गरिएको उक्त टहराले विक दम्पतीलाई खुकुरी तथा अन्य फलामजन्य सामग्री निर्माणका लागि सुरक्षित र व्यवस्थित कार्यस्थल उपलब्ध गराएको छ ।
नेपाली खुकुरी केवल एउटा हतियार मात्र नभई नेपालीको मौलिक पहिचान, साहस, गौरव र शानसँग जोडिएको छ । यो औजार बनाउने सीप पुस्तौंदेखि हस्तान्तरण हुँदै आएको परम्परागत सीप हो । तर, पछिल्लो समय सुरक्षित कार्यस्थल, आवश्यक पूर्वाधार तथा बजारको अभावका कारण संकटमा पर्दै गएको अवस्थामा वल्र्डलिंकको सहयोगले व्यवसायलाई निरन्तरता दिन थप हौसला मिलेको लाभग्राही राजु विकले बताए ।
खुकुरी निर्माणमा प्रयोग हुने परम्परागत ज्ञान, सीप र प्रविधि नयाँ पुस्तामा हस्तान्तरण गर्दै स्थानीय मौलिकता जोगाउनु आवश्यक रहेको स्थानीयको भनाइ छ । यस किसिमका पहलले “सीप जोगाऔँ, परम्परा बचाऔँ र स्थानीय व्यवसायलाई आत्मनिर्भर बनाऔँ” भन्ने उद्देश्यलाई समेत बल पुर्याउने विश्वास गरिएको छ ।
वल्र्डलिंकले समुदायको आवश्यकता पहिचान गरी सामाजिक तथा आर्थिक रूपमा पछाडि परेका समुदायको सीप संरक्षण, व्यवसाय प्रवर्द्धन र दिगो जीविकोपार्जनमा सहयोग पुर्याउने उद्देश्यले विभिन्न सामाजिक उत्तरदायित्व अन्तर्गतका कार्यक्रम सञ्चालन गर्दै आएको छ ।
टहरा हस्तान्तरण कार्यक्रममा स्थानीय प्रतिनिधि, समुदायका सदस्य तथा वल्र्डलिंकका प्रतिनिधिहरूको सहभागिता रहेको थियो । कार्यक्रममा परम्परागत सीप तथा व्यवसायको संरक्षणका लागि स्थानीय समुदाय, सरकार तथा निजी क्षेत्रबीच सहकार्य आवश्यक रहेकोमा जोड दिइएको थियो ।
