नेपाल एलपी ग्यास उद्योग संघले अहिले ग्यास आयात बढिरहेको भन्दै अभाव नहुने स्पष्ट पारेको छ । पछिल्लो समय लगातार ग्यासको आयात वृद्धि भइरहेको भन्दै संघले अभाव नहुने दाबी गरेको हो ।
पर्याप्त मात्रामा ग्यासको आयात भइरहेकाले अभाव नहुने भन्दै संघले उपभोक्तालाई अनावश्यक सिलिण्डर सञ्चय (होल्ड) नगर्न आग्रह गरेको छ ।
भारतबाट सहजै रुपमा एलपी ग्यासको आयात भइरहेको र नेपाली उद्योगबाट सिलिण्डर ‘रिफिलिङ’को काम निरन्तर भइरहेकाले आवश्यकताभन्दा बढी ग्यास खरिद गरेर होल्ड गर्नुपर्ने बाध्यता नरहेको संघले जनाएको छ ।
“उपभोक्ताले अतिरिक्त ग्यास खरिद नगर्ने हो भने अहिले देखिएको ग्यास अभावको समस्या तत्कालै समाधान हुने देखिन्छ । आगामी दिनमा पनि ग्यास आपूर्तिमा समस्या नहुने भएकाले ग्यासको अभाव देखिने सम्भावना छैन”, संघका अध्यक्ष दिवानबहादुर चन्दले विज्ञप्तिमा भनेका छन् ।
संघका अनुसार अहिले विगतको तुलनामा ग्यासको आयात करिब १५ प्रतिशतले वृद्धि भइरहेको छ । पछिल्लो २२ दिनमा मात्रै ३९ हजार ७७४ मेट्रिकटन ग्यास आयात भएको छ । यस आधारमा साउन महिना भरीमा ५५ हजार मेट्रिकटन ग्यास आयात हुने अनुमान गरिएको छ ।
नेपालमा मासिक करिब ४५ हजार मेट्रिक टन ग्यास खपत हुने गरेको छ ।
