हेटौंडा कपडा उद्योग पुनः सञ्चालनका लागि उद्योग मन्त्रालयको कार्यदलले तयार पारेको अध्ययन प्रतिवेदन उद्योगमन्त्री गौरीकुमारी यादवलाई बुझाइएको छ । उद्योग सञ्चालनको प्रतिवेदन अध्ययन कार्यदलले तत्काल परीक्षण उत्पादन थाल्ने र थप रणनीतिक योजनासहित पूर्ण क्षमतामा उद्योग सञ्चालन गर्ने खाकासहितको प्रतिवेदन बुझाएको हो ।
उद्योग मन्त्रालयको प्रशासन तथा संस्थान महाशाखाका प्रमुख रामबन्धु सुवेदीको संयोजकत्वमा गठित कार्यदलले प्रतिवेदन बुझाएको हो । प्रतिवेदन बुझ्दै मन्त्री यादवले हेटौंडा कपडा उद्योग पुनः सञ्चालन गर्न सरकारले प्राथमिकताका साथ काम गरिरहेको बताइन् ।
यता, कार्यदलले प्रतिवेदन मन्त्रीलाई बुझाएको भएपनि त्यस अगाडि नै नेपाली सेनाले दुई महिनाभित्र उद्योगबाट परीक्षण उत्पादन सुरु गर्ने गरी आवश्यक तयारी तीव्र पारेको छ । अर्थ मन्त्रालयबाट विनियोजित बजेटअनुसार सेनाले मेसिन मर्मत सुरु गरिसकेको छ ।
अर्थ मन्त्रालयले असार पहिलो साता सेनाको सैनिक सामग्री उत्पादन निर्देशनालयलाई ३३ लाख रुपैयाँ बजेट निकासा गरिसकेको छ । अहिले सेनाको प्राविधिक टोलीले उद्योग स्थलमा सरसफाइ र मेसिन मर्मतको काम सुरु गरिसकेको छ । परीक्षण उत्पादनका लागि सेनाले नै आवश्यक कच्चा पदार्थसमेत खरिद गरिसकेको छ ।
उद्योगको भौतिक संरचना तथा पूर्वाधार मर्मत गर्न पूर्वाधार विकास मन्त्रालयले ५० लाख रुपैयाँको लागत अनुमान पेश गर्दै मर्मतको जिम्मेवारी लिएको छ ।
