अमेरिका र इरानबीच युद्धविराम सम्झौता हुने पक्का भएको छ । इरानको सरकारी सञ्चार माध्यमले अमेरिका र इरानबीच १४ बुँदे सम्झौता हुने दाबी गरेको छ ।
इरानको अर्ध सरकारी समाचार एजेन्सी ‘मेहर न्युज’ले भने स्थायी युद्धविराम र इरानको आन्तरिक मामिलामा अमेरिकी हस्तक्षेप नहुने विषय सम्झौताका बुँदाहरुमा रहेको दाबी गरेको छ ।
३० दिन भित्र अमेरिकी नौसैनिक नाकाबन्दी हटाउने, इरानी क्षेत्रबाट अमेरिकी सैनिक फिर्ता हुने, इरानी व्यवस्था अनुसार ३० दिन भित्र स्ट्रेट अफ होर्मुज पुनः खुला गर्ने लगायतका बुँदाहरु पनि रहेको जनाइएको छ ।
अमेरिका र अमेरिकालाई सहयोग गरिरहेका देशहरुबाट इरानको पुनर्निर्माणका लागि ३ सय अर्ब डलर दिइने, इरानी तेल र ऊर्जा उत्पादनमा लगाइएको प्रतिबन्ध फुकुवा गरिने, परमाणु हतियार नबनाउन इरानले प्रतिवद्धता जनाउने विषय सम्झौतामा समावेश रहेको इरानी समाचार एजेन्सीहरुले जनाएका छन् ।
अन्तर्राष्ट्रिय सञ्चार माध्यमहरुका अनुसार सम्झौतामा आगामी शुक्रबार स्विट्जरल्यान्डमा औपचारिक हस्ताक्षर हुनेछ ।
युद्धविराम सम्झौता हुने भएसँगै अन्तर्राष्ट्रिय बजारमा कच्चा तेलको मूल्यमा भारी गिरावट आएको छ । युद्ध थप चर्किए प्रति ब्यारेल १५० डलरसम्म पुग्न सक्ने अनुमान गरिएको कच्चा तेलको मूल्य प्रति ब्यारेल ८५ डलर आसपासमा झरिसकेको छ ।
युद्धविराम सम्झौता पश्चात मूल्य अझै घटेर प्रति ब्यारेल ७० डलर सम्ममा आउन सक्ने अनुमान गरिएको छ ।
