भारत सरकारले चिनीको निकासीमा लगाएको प्रतिबन्धले नेपालमा ठूलो असर नपर्ने उद्योगीहरुले बताएका छन् । नेपाल चिनी उत्पादक संघका अध्यक्ष शशिकान्त अग्रवालले बिजनेश पानासँग कुरा गर्दै भारत सरकारको चिनीको निकासीमा प्रतिबन्ध लगाएपनि नेपाललाई असर नपर्ने बताएका हुन् ।
नेपालका उद्योगसँग पर्याप्त स्टक रहेको र उद्योगबाट चिनी बिक्रीका लागि लगेका स्टोरहरुमा पनि स्टक रहेका कारण तत्काल असर नपर्ने उनको भनाइ छ । उनका अनुसार नेपालमा वार्षिक २ लाख ७५ हजार मेट्रिक टन चिनी खपत हुँदै आएकोमा अझै ८० हजार मेट्रिक टन स्टकमै रहेको छ ।
‘अहिलेसम्म भारतबाट ७० हजार टन चिनी आयात भइसकेको छ’ उनले भने, ‘हामीसँग पनि पर्याप्त स्टक छ । यसकारण बजारमा अभाव हुने सम्भावना छैन । मूल्य पनि अत्याधिक बढ्ने देखिँदैन । तर, चिनी भनेको कमोडिटी भएकाले क्यारिङ कस्ट, बीमा, बैंकको ब्याज, स्टोर चार्ज लगायतका कारण सिजनको तुलनामा अफसिजनमा ४ रुपैयाँ, ५ रुपैयाँसम्म बढी पर्नु स्वभाविक हो ।’
भारतले २०२६ सेप्टेम्बर ३० सम्मका लागि चिनी निर्यातमा प्रतिबन्ध लगाएको छ ।
