काठमाडौँको चक्रपथ (रिङ रोड) विस्तार गर्न चीन सरकारले थप ११ अर्ब रुपैयाँ दिने भएको छ । उक्त अनुदान सहयोग सम्बन्धि सम्झौतामा बुधबार हस्ताक्षर भएको छ ।
सम्झौतामा भौतिक पूर्वाधार तथा यातायात एवम् सहरी विकासमन्त्री सुनील लम्साल र नेपालका लागि चिनियाँ राजदूत झांग माओमिंगले हस्ताक्षर गरेका छन् ।
सम्झौताअनुसार उक्त रकम कलंकीदेखि बसुन्धारासम्म विस्तार गर्न खर्च गरिनेछ । यसलाई चक्रपथ विस्तारको दोस्रो खण्ड भनिएको छ । कुल ८.२ किलोमिटर दूरीको यो खण्ड विस्तार गर्न उक्त रकमबाट सडक र पुल बन्नेछन् । यो खण्डमा अहिले नेपाली पक्षले साइड क्लियरेन्सको काम गरिरहेको छ ।
यसअघि चीन सरकारले पहिलो चरणमा कोटेश्वरदेखि कलंकीसम्म सडक विस्तार गरेको थियो ।
