यातयात व्यवसायीहरुले सरकारले तत्काल गाडी भाडा नबढाए आफैँले बढाउने चेतावनी दिएका छन् । नेपाल यातायात व्यवसायी राष्ट्रिय महासंघले सरकारले तत्काल सार्वजनिक यातायातको भाडा समायोजन नगरे आफैँले बढाउने चेतावनी दिएको हो ।
पेट्रोलियम पदार्थमा भारी मूल्य वृद्धि भएका कारण यातायात व्यवसायीहरू मारमा परेको भन्दै महासंघले तत्काल भाडादर समायोजन गर्न आग्रह गर्दै यदि भाडादर नबढाइए आफूहरुले नै स्वघोषणा गरेर लागू गर्ने र देशभरीका यातायात व्यवसायीहरुलाई सर्कुलेट गर्ने चेतावनी महासंघले दिएको छ । बुधबार भौतिक पूर्वाधार तथा यातायात मन्त्रीलाई भेटेर ध्यानाकर्षण पत्र बुझाउँदै महासंघले यदि अवरोध भएमा सेवा ठप्प पार्ने सम्मको चेतावनी दिएको छ ।
नेपाल यातायात व्यवसायी राष्ट्रिय महासंघका कार्यवाहक अध्यक्ष सरोज सिटौलाका अनुसार यातायात व्यवस्था विभागले चैत ५ गते भौतिक पूर्वाधार तथा यातायात मन्त्रालयलाई सार्वजनिक यात्रुबाहक सवारीमा ११.३३ प्रतिशत, तराईको मालवाहक सवारीमा ८.८१ प्रतिशत र पहाडको मालवाहक सवारीमा १४.२९ प्रतिशत भाडा बढाउन सिफारिस गरेपनि मन्त्रालयले निर्णय नगर्दा व्यवसायीहरु मारमा परेका छन् ।
