भदौ २३ र २४ गते भएको जेनजी आन्दोलनका कारण २३ सय बढीले रोजगारी गुमाएका छन् । जेनजी आन्दोलनमा भएको क्षतिको मूल्यांकन तथा सार्वजनिक संरचना पुनर्निर्माण योजना तयार गर्न गठित समितिले बुझाएको प्रतिवेदमा जेनजी आन्दोलनका कारण २ हजार ३ सय ५३ जनाले रोजगारी गुमाएको उल्लेख गरिएको छ ।
समितिले प्रधानमन्त्री सुशीला कार्कीलाई बुझाएको प्रतिवेदनमा २३ सयले रोजगारी गुमाउँदा १३ अर्ब ८४ करोड ५६ लाख रुपैयाँ बराबर वस्तु तथा सेवा उत्पादन प्रभावित भएको जनाइएको छ ।
समिति संयोजक एवं राष्ट्रिय योजना आयोग सचिव रविलाल पन्थले प्रतिवेदनको सारांश प्रस्तुति गर्दै ८४ अर्ब ४५ करोड ७७ लाख रुपैयाँ बराबर समग्र भौतिक क्षति भएको बताए । यस्तो क्षति हुने जिल्ला ५४ वटा र स्थानीय तह २ सय ६२ वटा रहेका छन् ।
जसमध्ये प्रभावित निकाय/संस्था २ हजार १ सय ६८ छन् । २ हजार ६ सय ७१ भवनमा क्षति पुगेको छ ।
यस्तै, १२ हजार ६५९ सवारीसाधन क्षतिग्रस्त हुँदा कुल १२ अर्ब ९३ लाख ६१ हजार बराबर नोक्सान भएको छ । निजी क्षेत्रतर्फ ३३ अर्ब ५४ करोड ८७ लाख बराबरको क्षति भएको प्रतिवेदनमा उल्लेख छ ।
समितिले पुनर्निर्माण कार्ययोजना पनि पेश गरेको छ । पुनर्निर्माणतर्फ भवनमा १९ अर्ब ९८ करोड ९८ लाख र सवारीसाधनमा ६ अर्ब १६ करोड ८० लाख लाग्ने अनुमान छ । अन्य भौतिक सम्पत्तिको क्षति कभर गर्न १० अर्ब १४ करोड ४२ लाख लागत अनुमान गरिएको छ ।
पुनर्निर्माणमा संघमा २४ अर्ब ६९ करोड ५८ लाख, प्रदेशमा ३ अर्ब ७४ करोड र स्थानीय तहमा ७ अर्ब ८६ करोड लागत लाग्ने अनुमान छ ।
मन्त्रिपरिषदले योजना आयोगका सचिवको संयोजकत्वमा असोज ५ गते यो समिति गठन भएको थियो । समितिले ७५ दिनमा आफ्नो प्रतिवेदन बुझाएको हो ।
