हाल देशका देशका विभिन्न भागमा पश्चिमी वायु र ‘मोन्था’ चक्रवातको आंशिक प्रभाव परेकाले विभिन्न स्थानमा वर्षा हुने सम्भावना रहेको जल तथा मौसम पूर्वानुमान महाशाखाले जनाएको छ । साथै देशमा पश्चिमी वायुको सक्रिय प्रभाव छ भने अरब सागरमा बनेको न्यून चापीय प्रणाली र बङ्गालको खाडीमा विकसित चक्रवात “मोन्था” को आंशिक प्रभाव परेको छ ।
महाशाखाका अनुसार कोशी, मधेश, बागमती, गण्डकी र लुम्बिनी प्रदेशसहितका पहाडी भू–भागमा आज दिउँसो अधिकांश समय बादल लाग्ने छ भने तराईका भू–भागमा सामान्य बदली रहनेछ । कोशी, मधेश र बागमती प्रदेशका धेरै स्थानहरूमा मध्यम वर्षा हुने सम्भावना छ । गण्डकी र लुम्बिनी प्रदेशका पहाडी तथा हिमाली क्षेत्रका केही स्थानमा वर्षा र हिमपातको सम्भावना छ । कर्णाली र सुदूरपश्चिम प्रदेशका केही स्थानमा हल्का वर्षा हुने विभागको पूर्वानुमान छ ।
महाशाखााले देशका उच्च पहाडी तथा हिमाली भू–भागका केही भागमा मध्यम हिमपात हुन सक्ने जनाएको छ । वर्षा र हिमपातको सम्भावना रहेका स्थानको यात्रा गर्ने तथा ती भेगका किसानलाई महाशाखाले सतर्कता अपनाउन पनि आग्रह गरेको छ ।
त्रिभुवन विश्वविद्यालयका मौसम विज्ञान केन्द्रीय विभागका सहप्राध्यापक डा. विनोद पोखरेलका अनुसार गएरातिबाट सुरु हुने वर्षाले नेपालको धेरै ठाउँमा भारी वर्षा गराउने देखिएको छ। काठमाडौँमा लगभग २४-घण्टा, मधेश र कोशीमा ३६-घण्टासम्म बर्षा हुने पूर्वानुमान गरिएको उनले बताएका छन् । उनका अनुसार तीन वटा मौसमी मोडलले बर्षाको मात्रा फरक देखाए पनि वर्षा हुने ठाउँ र अबधि उस्तै देखाएकोले एकदमै सजग हुनु पर्छ।
जलवायु तथा विपद् विज्ञ डा. धर्मराज उप्रेतीका अनुसार नेपालमा चक्रवातको बाहिरि घेराको प्रभाव कार्तिक १३ गतेको दिउँसो देखि सुरु हुने छ । उनका अनुसार बुटवल – चितवन हुदै पुर्बी भुभाग- बागमति, मधेस प्रदेश र कोशी प्रदेशको धेरै भागमा सुरु भैइ, मुख्य प्रभाव शुक्रबार १४ गते र १५ गते देखिन्छ। चक्रवातको मुख्य केन्द्र भने भारतको बिहार हुदै पश्चिम बङाल अनि आसाम मेघालय तिर जाने उनले बताए ।
उनका अनुसार मधेस प्रदेश र कोशी प्रदेशको धेरै भागमा मध्यम देखि भारी वर्षाको संभावना कार्तिक १४-१५ गते हुने देखिन्छ । सुदुर पश्चिम , कर्णालीमा बादल लागे पनि ठुलो वर्षाको सम्भावना कम रहेको उनले उल्लेख गरेका छन्।
