ग्लोकल टीन हिरोको शीर्ष ६ फाइनलिस्टहरूको नाम घोषणा

ग्लोकल प्रा.लि.ले ११ औं संस्करणको गोल्छा ग्रुप प्रस्तुत ग्लोकल टिन हिरो नेपाल २०२५ को लागि शीर्ष ६ फाइनलिस्टहरूको नाम घोषणा गरेको छ। आयोजकका अनुसार यस वर्षको प्रतियोगितामा बालबालिकाको अधिकार, नवप्रवर्तन, प्रविधि, उद्यमशीलता, शिक्षा, स्वास्थ्य, सामाजिक क्रियाशीलता, पर्यावरण, एआई विज्ञान/अनुसन्धान र अन्य विभिन्न क्षेत्रमा समाजमा सकारात्मक प्रभाव पारेका ७८४ किशोरकिशोरीहरूबाट आवेदन प्राप्त भएको थियो।

ग्लोकल २० अण्डर २० छनोट गरिएका उत्कृष्ट किशोरकिशोरीहरूको विवरण र दस्तावेजहरूको समीक्षा निर्णायक मण्डलले गरेको कम्पनीले जनाएको छ। त्यसपछि उनीहरूको कामको सुरुवात, उपलब्धि, निरन्तरता र समाजमा पारेको प्रभावको आधारमा गोल्छा ग्रुप प्रस्तुत ग्लोकल टिन हिरो नेपाल २०२५ का लागि अन्तिम चरणमा शीर्ष छ फाइनलिस्टहरूलाई सर्टलिस्ट गरिएको कम्पनीले उल्लेख गरेको छ।

सदस्यीय निर्णायक मण्डलले यी ६ जना प्रतिभाशाली किशोरकिशोरीहरूलाई उनीहरूको उपलब्धि, पहल र आ-आफ्नो क्षेत्रमा पुर्याएको योगदानका लागि सर्टलिस्ट गरेको बताईएको छ।

शीर्ष ६ फाइनलिस्टहरू यसप्रकार छन् :

१. कृष्ण यादव, धनुषा- सामग्री निर्माता

२. मानुषी न्यौपाने, स्याङ्जा- यौन तथा प्रजनन स्वास्थ्य अधिकार (SRHR) अधिवक्ता

३. निश्चल ढुंगाना, कपिलवस्तु जलवायु न्याय अधिवक्ता

४. अक्सफोर्ड आचार्य, जुम्ला- नीति अधिवक्ता

५. रेणुका सिंह, सर्लाहीकी- कृषि उद्यमी

६. सफल पौडेल, रुपन्देही- एआई विकासकर्ता

आयोजकका अनुसार आगामी दिनहरूमा, फाइनलिस्टहरूले आफ्नो ज्ञान र सञ्जाल विस्तार गर्नका लागि सेल्फ-कम्पिटेन्सी वर्कसपमा भाग लिनेछन्। त्यसैगरी, कर्पोरेट कम्पनीका प्रतिनिधिहरू, दूतावासहरू, र उद्योगका प्रशिक्षकहरूसँग अन्तरक्रिया गर्नेछन्। निर्णायक मण्डलले सेप्टेम्बर १ मा फाइनलिस्टहरूको अन्तर्वार्ता लिनेछन्। साथै, एसएमएस मतदान अगस्ट २१ को साँझ ५ बजेदेखि अगस्ट ३१ को साँझ ५ बजेसम्म खुल्ला हुने कम्पनीले जनाएको छ  ।