उद्योग, वाणिज्य तथा आपूर्तिमन्त्री दामोदर भण्डारीसँग रोजगारदाताको अन्तर्राष्ट्रिय संगठन ‘इन्टरनेसनल अर्गनाइजेसन अफ इम्प्लोयर्स’ (आईओई)का महासचिव रोबर्टो स्वारेज सान्तोसले भेट गरेका छन् ।
भेटका क्रममा मन्त्री भण्डारीले कोभिड–१९ महामारी तथा विश्व आपूर्ति शृङ्खलामा देखिएका अवरोधबीच नेपालको अर्थतन्त्र पुनरुत्थान हुने क्रममा रहेको उल्लेख गरेका छन् । उनले नेपालको आर्थिक विकासमा निजी क्षेत्रको महत्वपूर्ण भूमिका रहेको र सरकारले व्यवसायमैत्री तथा लगानीमैत्री वातावरण बनाउने काम गरिरहेको पनि बताएका छन् ।
उनले नेपाल लगानीको लागि अनुकुल गन्तव्यका रुपमा विकसित हुँदै गइरहेको जानकारी गराउँदै विदेशी लगानी भित्र्याउन अहिले नीतिगत, कानुनी र प्रक्रियागत सुधार भइरहेको पनि जानकारी गराएका छन् । मन्त्री भण्डारीले सरकारले लगानी सहजीकरणका लागि गरेका सुधारकै कारण अहिले विदेशी लगानी स्वीकृतिका दर बढिरहेको पनि बताएका छन् ।
मन्त्री भण्डारीले नेपालको सन् २०२६ मा अतिकम विकसित मुलुकबाट हुने स्तरोन्नति तथा दिगो विकास लक्ष्य प्राप्तिका सन्दर्भमा थप स्रोत, प्रविधि, क्षमता विकास र साझेदारी आवश्यक रहेको पनि बताए ।
आईओईका महासचिव सान्तोसले नेपालको लगानी सम्भावना तथा अतिकम विकसित मुलुकबाट हुने स्तरोन्नतिले सिर्जना गरेको अवसर र चुनौतीबारे आफूले बुझ्ने अवसर पाएको बताए । उनले नेपालको साना तथा मझौला उद्यमीको क्षमता विस्तारमा सहकार्य गर्न सकिने पनि बताएका छन् ।
