सुनचाँदी व्यवसायीहरुले उपप्रधान एवम् अर्थमन्त्री विष्णु पौडेलसमक्ष सुनचाँदीको भन्सार दर घटाउन माग गरेका छन् । भारतमा सुनको भन्सार दर ६ प्रतिशत कायम भएको र नेपालमा २० प्रतिशत तोकिएकाले व्यापार असन्तुलन हुन गई सुनको अवैध कारोबार बढ्ने र राजस्वसमेत गुम्न जाने भन्दै व्यवसायीहरुले सुनको भन्सार दर ८ प्रतिशतमा झार्न माग गरेका छन् ।
नेपाल सुनचाँदी रत्न तथा आभुषण महासंघ, नेपाल सुनचाँदी व्यवसायी महासंघ र नेपाल हस्तकला महासंघको संयुक्त टोलीले उपप्रधान एवम् अर्थमन्त्री पौडेलसँग भेटगरी यस्तो माग गरेका हुन् ।
सुनचाँदी व्यवसायी सम्वद्ध ३ वटै महासंघले भारतमा हालै सार्वजनिक भएको बजेटमार्फत सुनचाँदीको भन्सार दर घटाएर ६ प्रतिशत कायम गरिएको तर, नेपालमा भने भन्सार दर २० प्रतिशत कायम रहेकोले व्यापार असन्तुलन हुन गएको र यस्तो असन्तुलनलाई रोक्न तत्काल भन्सार दरलाई घटाई सुनमा ८ प्रतिशत र चाँदीमा ६ प्रतिशत भन्सार दर कायम गर्न माग गर्दै अर्थमन्त्रीलाई संयुक्त ज्ञापन पत्र बुझाएका छन् ।
