तिहारको रौनकता सूर भएसँगै काठमाडौँ उपत्यकासहित देशका शहर बजारमा ‘झिलिमिली बत्ती’को उपयोग पनि बढ्दो छ । खासगरी, लोडसेडिङ अन्त्य भएपछि यत्ता बत्तीको प्रयोग हरेक वर्ष बढिरहेको छ ।
कोभिड १९ को बेला कम कारोबार भएको ‘झिलिमिली बत्ती’को किनबेच अहिले बढिरहेको छ । उज्यालो पर्वका रुपमा मनाईने तिहारमा घरको सजावटका लागि यस्ता बत्तीहरुको प्रयोग हरेक वर्ष बढ्दै गएको व्यवसायीहरु बताउँछन् । ‘एक पटक किनेपछि तिहारभरी बाल्ने र तिहार सकिएपछि झिकेर राख्ने गरिन्छ, अनि फेरि अर्को वर्षको तिहारमा पनि त्यो बत्ती बाल्न मिल्छ’ लाजिम्पाटस्थित एक इलेक्ट्रोनिक्स पसलका सञ्चालक भन्छन्, ‘त्यहीँ भएर मान्छेहरु अहिले यस्ता बत्तीतर्फ आकर्षित भएका छन् ।’
विभिन्न डिजाइन तथा रङ्गमा बजारमा आएका यी बत्तीहरु ८५ प्रतिशत हाराहारी चीनबाट आयात हुन्छन् । नेपाल विद्युतीय व्यवसायी महासंघका अध्यक्ष रेशम प्रसाद देवकोटाका अनुसार व्यक्तिगत घर, व्यवसायिक भवन तथा मठ मन्दिरहरुमा अहिले झिलिमिली बत्ती बाल्ने क्रम बढ्दो छ । उनका अनुसार यसवर्षको तिहारमा ४० करोड हाराहारीको झिलिमिली बत्तीको कारोबार हुने अनुमान गरिएको छ ।
बजारमा थरीथरीका झिलिमिली बत्ती पाइन्छन् । अध्यक्ष देवकोटाका अनुसार ९ मिटर लामो विभिन्न रङ्गका बत्ती बल्ने तारदेखि १०० मिटर लामो रोप लाइटसम्म उपलब्ध छन् । जसको मूल्य क्रमशः २०० देखि करिब १५ हजार रुपैयाँसम्म छ । साथै, बिजुलीमा जोडेपछि बल्ने दियो पनि बजारमा उपलब्ध छ । धागोले बनाइएको तेलमा भिजाएर बाल्नुपर्ने दियोको सट्टा अहिले यस्तो दियोको प्रयोग बढ्दो छ ।
स्ट्रिङ लाइट, नेट लाइट, पाइप लाइट लगायतका विभिन्न नामका बत्तीहरु अहिले बजारमा पाइने गरेको व्यवसायीहरुको भनाइ छ ।
