प्रधानमन्त्री बालेन्द्र शाह आइतबार अपरान्ह भारत भ्रमणमा जाँदैछन् । त्यस क्रममा नेपाल र भारतका उद्यमी व्यवसायीसहित ‘इन्डिया–नेपाल बिजनेस राउन्डटेबल’को आयोजना हुनेछ । उक्त कार्यक्रम भारतको नयाँ दिल्लीस्थित होटल ताजमहलमा २२ नोभेम्बरमा आयोजना हुने तय भएको भारतीय विदेश मन्त्रालयले जनाएको छ ।
तर, बिजनेस राउन्डटेबलमा नेपालको तर्फबाट सरकारका दुइ मन्त्री र व्यावसायिक नेतृत्वको प्रतिनिधित्व रहे भए पनि भारतीय पक्षबाट उच्चस्तरीय सहभागिता भने नहुने भएको छ । सार्वजनिक भएको कार्यक्रम तालिकाअनुसार नेपालका तर्फबाट अर्थमन्त्री डा. स्वर्णिम वाग्ले, परराष्ट्रमन्त्री शिशिर खनाल, लगानी बोर्ड नेपालकी प्रमुख कार्यकारी अधिकृत याङ्की उक्याब, नेपाल उद्योग वाणिज्य महासंघका अध्यक्ष अन्जन श्रेष्ठ र महासंघकी पूर्वअध्यक्ष एवम् इन्डिया–नेपाल जोइन्ट बिजनेस फोरमकी सह–अध्यक्ष भवानी राणा सहभागी हुने छिन् ।
तर, भारतीय पक्षबाट भने सरकार र निजी क्षेत्र दूबैबाट उक्त कार्यक्रममा उच्चस्तरीय सहभागीता नहुने देखिएको छ । कार्यक्रम तालिकामा उक्त राउन्डटेबलमा भारत सरकारका कुनै मन्त्री सहभागी हुने उल्लेख छैन । यति मात्रै होइन, भारतीय उद्यमी व्यवसायीको छाता संस्था भारतीय उद्योग परिसंघ (सीआईआई)का पदाधिकारीको नाम पनि औपचारिक वक्ताको सूचीमा छैन । कार्यक्रममा भारतीय पक्षबाट सीआईआईको इन्टरनेशनल काउन्सिल समितिका सहअध्यक्ष तथा सन इन्टरनेशनल लिमिटेडका अध्यक्ष विक्रमजीत सिंह साहने वक्ताका रुपमा राखिएका छन् ।
परराष्ट्रय मन्त्रालयले नेपाल र भारतबीच दुइपक्षीय लगानी, व्यापार र आर्थिक कुटनीति विस्तार गर्ने लक्ष्यसहित उक्त कार्यक्रम आयोजना हुने जनाएपनि राउन्डटेबलमा भारतीय पक्षको उच्च नेतृत्व सहभागी नहुने भएपछि यसले अपेक्षित लाभ हुनेमा आशंका उत्पन्न गराएको छ ।
यस्तो छ कार्यक्रम तालिकाः











