नेपाल चेम्बर अफ कमर्सका निवर्तमान अध्यक्ष राजेन्द्र मल्लले प्रधानमन्त्री बालेन्द्र शाहको भारत भ्रमणलाई नेपालको आर्थिक कुटनीति सुदृढ गर्ने ऐतिहासिक अवसरका रूपमा उपयोग गर्नुपर्ने बताएका छन् । आइतबार प्रधानमन्त्री भारत भ्रमणमा जाँदै गरेको पूर्व सन्ध्यामा निवर्तमान अध्यक्ष मल्लले प्रधानमन्त्रीको भ्रमण औपचारिकतामा सिमित नभई भारतसँगको आर्थिक कुटनीतिलाई बढावा दिने अवसरका रुपमा उपयोग गरिनुपर्ने धारणा राखेका हुन् ।
भारतसँगको करिब साढे ९ खर्ब भन्दा बढीको व्यापार घाटा रहेको स्मरण गर्दै उनले यो व्यापार घाटा न्यूनीकरण, जलविद्युत् निर्यात, भैरहवा र पोखरा अन्तर्राष्ट्रिय विमानस्थलका लागि थप हवाई प्रवेश मार्ग, भारतीय पर्यटक आकर्षण तथा उत्पादनमूलक क्षेत्रमा लगानी वृद्धि गर्न दुइ देशबीच ठोस सहमति निर्माण गरिनुपर्ने उल्लेख गरेका छन् ।
साथै, हवाई कनेक्टिभिटीसँगै गुणस्तरीय रेलमार्ग विस्तारलाई पनि उच्च प्राथमिकता दिनुपर्ने भन्दै उनले नेपालमा प्रशस्त जलविद्युत् सम्भावना र चिसो हावापानी भएका स्थानको उपयोग गरी डाटा सेन्टर निर्माण, एआई तथा आईटी सेवा विकास र अन्तर्राष्ट्रिय बजारमा आईटी सेवा निर्यातलाई प्राथमिकता दिनुपर्ने समेत बताएका छन् ।
मल्लले कुटनीति अब औपचारिकतामा मात्र नभई व्यापार, लगानी, प्रविधि, रोजगारी र राष्ट्रिय समृद्धिको ठोस परिणाममा देखिनुपर्ने जनाएका छन् ।










