प्रधानमन्त्री बालेन्द्र शाहको दुई दिने राजकीय भारत भ्रमणमा नेपालको पूँजी बजार क्षेत्रको प्रतिनिधित्व गर्दै स्टक ब्रोकर एसोसिएसन अफ नेपालका अध्यक्ष सागर ढकाल पनि सहभागी हुने भएका छन् । प्रधानमन्त्रीको भ्रमणलाई राजनीतिक तथा कूटनीतिक सम्बन्ध विस्तारसँगै आर्थिक सहकार्य र लगानीका नयाँ सम्भावना खोज्ने अवसरका रूपमा हेरिएका बेला पूँजी बजार क्षेत्रका नेतृत्वकर्ता ढकालको सहभागितालाई पनि अर्थपूर्ण रूपमा हेरिएको छ ।
नेपाल उद्योग वाणिज्य महासंघका कार्यसमिति सदस्यसमेत रहेका ढकाल प्रधानमन्त्रीसँग भारत जाने ५२ सदस्यीय व्यावसायिक प्रतिनिधिमण्डलमा समेटिएका छन् । उनी नेपालको पूँजी बजार क्षेत्रको प्रतिनिधित्व गर्दै भारत जाने व्यवसायीमध्ये एक हुन् ।
नेपालको पूँजी बजारलाई थप व्यवस्थित, पारदर्शी र लगानीमैत्री बनाउने विषय अहिले आर्थिक क्षेत्रको महत्त्वपूर्ण एजेन्डा बनेको छ । पूँजी परिचालन, लगानीकर्ताको विश्वास अभिवृद्धि र वित्तीय क्षेत्रको विकासमा नीतिगत सहकार्य आवश्यक भइरहेका बेला भारतीय बजार र त्यहाँको वित्तीय क्षेत्रसँग अनुभव आदानप्रदान गर्ने अवसरका रूपमा उनको भ्रमणलाई लिइएको छ ।
भारत नेपालको सबैभन्दा ठूलो व्यापारिक साझेदार हुनुका साथै बैंकिङ, वित्तीय सेवा र पूँजी बजारको क्षेत्रमा पनि महत्त्वपूर्ण अनुभव भएको मुलुक हो । यस्तो अवस्थामा भारतीय व्यावसायिक तथा वित्तीय क्षेत्रका प्रतिनिधिसँग हुने संवादले नेपालको पूँजी बजारको सम्भावना र चुनौतीलाई अन्तर्राष्ट्रिय स्तरमा चिनाउने अवसर प्रदान गर्न सक्छ ।
प्रधानमन्त्रीको भ्रमणका क्रममा आयोजना हुने नेपाल–भारत बिजनेस फोरममा दुई देशबीच व्यापार, लगानी, औद्योगिक साझेदारी तथा आर्थिक सहकार्य विस्तारका विषयमा छलफल हुनेछ । यसले निजी क्षेत्रका प्रतिनिधिलाई भारतीय लगानीकर्ता तथा व्यवसायीसँग प्रत्यक्ष सम्बन्ध स्थापित गर्ने अवसरसमेत दिने अपेक्षा गरिएको छ ।
नेपालको पूँजी बजारमा संस्थागत सुधार, लगानीको दायरा विस्तार र नयाँ वित्तीय उपकरणको विकासका विषयमा बहस भइरहेका बेला भारत भ्रमणलाई अनुभव आदानप्रदान तथा सम्भावित सहकार्यका दृष्टिले उपयोग गर्न सकिनेछ र यसमा ढकालको सहभागिताले पूँजी बजार क्षेत्रका मुद्दालाई पनि आर्थिक कूटनीतिको बहससँग जोड्ने अवसर दिएको यस क्षेत्रका जानकारहरु बताउँछन् ।










