पुँजीबजार नीति कार्यान्वयनको लागि नेप्से र CDSC लाई कार्ययोजना पेश गर्न सेबोनको निर्देशन

बोर्डबाट असार ३० गते सार्वजनिक भएको नेपालको पूँजी बजार विकास मार्गचित्र, २०८३ र आर्थिक वर्ष २०८३।८४ को पूँजी बजार नीति तथा सोको कार्यान्वयन योजनाबारे बोर्डले छलफल गरेको हो । बोर्डको नीति तथा कार्यक्रममा पूँजी बजारमा नयाँ उपकरण तथा सेवा विविधीकरण गर्ने विषयलाई प्राथमिकतामा राखिएको छ ।

बोर्डका कार्यक्रमहरूलाई प्रभावकारीरूपमा सम्पादन गरी बजार विकास तथा सुधारको कार्य अगाडि बढाउने क्रममा बोर्डका अध्यक्ष डा. गोपाल प्रसाद भट्टको उपस्थितिमा नेप्से र सिडिएससँग छलफल गरिएको बोर्डले जनाएको छ । बोर्डका अनुसार छलफल आर्थिक वर्ष २०८३।८४ को पूँजी बजार नीतिमा समाविष्ट भई नेप्से तथा सिडिएससीबाट सम्पादन हुनुपर्ने कार्यहरूमा केन्द्रित रहेको थियो ।

उक्त छलफल पश्चात बोर्डका अध्यक्षले बजार विकासका लागि बोर्डको नीतिमा तय गरिएका ती निकायसँग सम्बन्धित कार्यक्रमको ठोस कार्ययोजना तयार गरी बोर्डमा यथाशीघ्र पेश गर्न निर्देशन दिएका छन् । साथै Short Selling सेवा सञ्चालन व्यवस्था मिलाउनका लागि गर्नुपर्ने कानुनी सुधार तथा संरचनागत (जनशक्ति र प्रविधि) को आवश्यकता पहिचानसहित यथाशीघ्र कार्य अगाडि बढाउन आवश्यक पूर्वाधारको व्यवस्था गर्न बोर्ड सबै प्रकारको सहजीकरणको लागि तयार भएको समेत बोर्ज अध्यक्षले जानकारी दिएका छन्।