अर्थमन्त्री डा. स्वर्णिम वाग्लेले आर्थिक वर्ष २०८३/८४ को बजेट मार्फत गरिएको शेयरको पुँजीगत लाभकर फाइनल नै भएको बताएका छन्। आज बजेटबारे पत्रकार सम्मलेनमा उनले पुँजीगत लाभकर फाइनल नै रहेको प्रष्ट पारे ।
उनले लगानीकर्ताहरुको आग्रह बमोजिम नै लाभकरलाई फाइनल गरिएको उल्लेख गरे। उनले लगानीकर्ताहरु लाभकर बढाएर १५ प्रतिशत पुर्याए पनि हुन्छ तर फाइनल गरिनु पर्ने आग्रह गर्दै मन्त्रालय आएको पनि खुलासा गरे। वर्षौदेखि तरवारको रुपमा रहेको त्यसलाई प्रष्ट पार्न आग्रह गरिए अनुसार नै लाभकरलाई अन्तिम हुने व्यवस्था गरिएको उनले बताए।
करलाई अन्तिम मानेपछि ५ प्रतिशतलाई बढाएर ७.५ प्रतिशत र ७.५ प्रतिशतलाई बढाएर १० प्रतिशत कायम गरेको उनले जानकारी दिए ।
उनले ४० लाखको विषयमा पनि प्रष्ट पारे । यदि कसैको शेयरबजार बाहेक अन्य स्रोतबाट पनि ४० लाख बढीको आम्दानी रहेछ भने उसले विवरण भर्नु पर्ने बताए। तर विवरण भर्दा शेयरबजारको आम्दानीमा लाभकर तिरे पछि फाइनल नै हुने र थप कर नलाग्ने उनले प्रष्ट पारेका छन् ।
