नेपाल स्टक एक्सचेन्ज नेप्सेले हाल बन्द रहेको शेयरबजार असोज २ गते बिहीबारदेखि खुलाउने भएको छ। धितोपत्र बोर्डले आज भदौ ३१ गते नेप्सेलाई असोज २ गतेदेखि बजार खोल्न निर्देशन दिएको हो।
यस अघि नेप्सेले नै असोज १ गतेदेखि बजार खोल्ने निर्णय गरेर बोर्डमा प्रस्ताव गरेको थियो। धितोपत्र बोर्डको आज बिहान बसेको संचालक समितिको बैठकले असोज २ गतेबाट बजार खुलाउने निर्णय गरेको हो।
असोज १ गतेदेखि बजार खोल्ने गरि धितोपत्र बोर्डमा प्रस्ताव पठाईकोमा असोज १ गते सरकारले सार्वजनिक विदा दिएकोले अब असोज २ गतेबाट मात्र बजार खुल्ने भएको हो। सोमबार साँझ बसेको मन्त्रिपरिषद्को बैठकले असोज १ गते बुधबार सार्वजनिक विदा दिने निर्णय गरेको हो। जेनजी आन्दोलनको क्रममा मृत्यु भएकाहरुको सम्झनामा असोज १ गते शोक दिवस मनाउने र सो दिन सार्वजनिक विदा दिने निर्णय सरकारले गरेको हो।
यस अघि बजार दुई घण्टा मात्र खुल्ने, सर्किट ब्रेकको नियम परिवर्तन हुने हल्ला चले पनि ति सबै निराधार भएको नेप्सेले जनाएको छ। बिहीबारदेखि साविक कै नियम र समय अनुसार बजार खुल्ने छ।
यस अघि बजार असोज ५ गतेदेखि मात्र खुल्ने निर्णय नेप्सेले गरेको थियो। तर नयाँ सरकार गठन भईसकेको, निषेधाज्ञा र कर्फ्यु समेत हटिसकेको, र जनजीवन सामान्य भईसकेकोले अब सो मिति अगावै बजार खोल्ने तयारी गरिएको हो।
विभिन्न लगानीकर्ता संघहरुले राजनीतिक स्थिरता नभएसम्म बजार नखोल्न माग गर्दै आएका थिए।
