सुपर खुदी हाइड्रोपावर लिमिटेडले निष्काशन गरेको आईपीओमा एक घण्टा मै माग भन्दा बढीको आवेदन परेको छ । कम्पनीले आज फागुन ५ गतेदेखि सर्वसाधारणलाई १२ लाख ८६ हजार ५ सय कित्ता शेयर निष्काशन गरेको हो।
कम्पनीका अनुसार आज बिहान ११ बजेसम्ममा नै अर्थात् आवेदन खुलाएको एक घण्टा मै कम्पनीको आईपीओमा १५ करोड रुपैयाँभन्दा बढीको अर्थात् १५ लाख कित्ता भन्दा धेरैको लागि आवेदन परेको छ। यस संगै कम्पनीको आईपीओ पहिलो घण्टा मै पुरै बिक्री भएको हो।
यस निष्काशनमा फागुन ११ गतेसम्म आवेदन दिन सकिने छ। आवेदन दिंदा न्युनतम १० कित्ता र अधिकतम १ लाख कित्ताको लागि दिन सकिने छ। शेयर निष्काशनको लागि ग्लोबल आईएमई क्यापिटल बिक्री प्रबन्धक रहेको छ।
कम्पनीले यस अघि नै आयोजना प्रभावित स्थानीय र वैदेशिक रोजगारीमा रहेका नेपालीलाई आईपीओ निष्काशन गरि बाँडफाँड गरिसकेको छ । नेपाल धितोपत्र बोर्डले पुस ६ गते गते कम्पनीलाई आईपीओ निष्काशनको अनुमति दिएको थियो।
यस कम्पनीले लमजुंगमा २६ मेगावाट क्षमताको अपर खुदी जलविद्युत आयोजना निर्माण गरिरहेको छ । आयोजनाको भौतिक प्रगति ८३.३० प्रतिशत रहेको छ। यस कम्पनी अध्यक्ष चेतन प्रधान हुन् भने अन्य संचालकमा गणेश कार्की, बटु लामिछाने, निभिता प्रधान, र स्वतन्त्र संचालकमा दल बहादुर विष्ट रहेका छन् ।
