स्वर्णिम होटेल लिमिटेडले आईपीओ निष्काशनको अनुमति माग गर्दै नेपाल धितोपत्र बोर्डमा आवेदन दिएको छ । कम्पनीले मङ्सिर १६ गते बोर्डमा आवेदन दिएको हो।
कम्पनीले ३८ करोड रुपैयाँ बराबरको ३८ लाख कित्ता साधारण शेयरको सार्वजनिक निष्कासन गर्नको लागि अनुमति माग गरेको हो। आईपीओ निष्काशन गर्नको लागि ग्लोबल आईएमई क्यापिटललाई बिक्री प्रबन्धक रहेको छ।
यस कम्पनीले काठमाडौँको नक्सालमा होलिडे इन एक्प्रेस काठमाडौँको ब्राण्डमा होटेल संचालन गरिरहेको छ । होटेलमा ९९ वटा डिलक्स रुम र एउटा सुइट रुम रहेको छ। यो होटेल सन् २०२३ को डिसेम्बरबाट पूर्ण रुपमा संचालनमा आएको छ।
यस कम्पनीमा नरेश लाल श्रेष्ठको सर्वाधिक ३८ प्रतिशत शेयर लगानी रहेको छ। उनी कम्पनीका अध्यक्ष हुन् ।
कम्पनीको प्रबन्ध संचालकमा महेश्वर श्रेष्ठ रहेका छन् भने अन्य संचालकमा निलिमा श्रेष्ठ, संदेश श्रेष्ठ, विनय भण्डारी, र घनश्याम थापा रहेका छन् । स्वरुपा श्रेष्ठ कम्पनीको स्वतन्त्र संचालक हुन् ।
