शेयर बजार परिसूचक नेप्से ४ प्रतिशतले बढेपछि आज बजारमा पहिलो सर्किट ब्रेक लागेको छ। ११ बजेर १ मिनेट २० सेकेन्ड हुँदा बजार ४ प्रतिशतले बढेपछि बजारमा सर्किट ब्रेक लागेको हो । अब कारोबार २० मिनेटपछि सुरु हुने छ ।
यो समाचार तयार पार्दासम्म सूचक ८२.४८ अंकले बढेर २१३५.८७ को बिन्दुमा पुगेको छ । आज मंगलबारको प्रि ओपन सेसनमा शेयर बजार परिसूचक नेप्से सूचक ३२.४४ अंकले बढेर २०८५.८२ को बिन्दुमा पुगेको थियो।
हालको सत्ता समीकरण फेरबदल भएर एमाले र कांग्रेस सम्मिलित सरकार बन्ने सहमति राजनीतिक वृत्तमा भएपछि शेयर लगानीकर्ता उत्साहित भएका छन् । एमालेले अर्थ मन्त्रालय पाउने सहमति भए पछि फेरी एमालेबाट विष्णु पौडेल अर्थमन्त्री हुने बजार चर्चा छ। उनी शेयर बजारले अत्यधिक रुचाएका अर्थ मन्त्री हुन् ।
