आईपीओ निष्काशनको तयारीमा रहेका दुई वटा होटेल कम्पनी मर्ज भएका छन् । अर्किड होल्डिङ्स लिमिटेड र माउन्टेन ग्लोरी लिमिटेड मर्ज भएका छन् ।
मर्जरपछि यी दुई कम्पनीले वैशाख १८ गतेदेखि अर्किड ग्लोरी लिमिटेडको नामबाट एकिकृत कारोबार गर्ने भएका छन् । दुवै कम्पनी १:१ को स्वापमा अर्थात् समान हैसियतमा मर्ज भएका हुन् । मर्जर पश्चात कम्पनीको केन्द्रीय कार्यालय काठमाडौँ महानगरपालिका वडा नम्बर १४ मा रहने छ।
अर्किड होल्डिङ्सले काठमाडौँको रविभवनमा होटेल क्राउन इम्पेरियल सञ्चालनमा गरिरहेको थियो। यो चार तारे होटल हो। माउन्टेन ग्लोरी लिमिटेडले पोखरामा माउन्टेन ग्लोरी फोरेष्ट रिसोर्ट एण्ड स्पा सञ्चालन गर्दै आएको थियो। अब यी दुवै होटेल अर्किड ग्लोरी लिमिटेडले संचालन गर्ने छ ।
यी दुवै कम्पनीले आईपीओ निष्काशन प्रक्रिया अगाडि बढाएका थिए । अब भने यी दुई कम्पनी मर्ज भएपछि अर्किड ग्लोरी लिमिटेडको आइपीओ आउने छ ।
