रसुवागाढी नाका बाढीका कारण क्षतिग्रस्त भएपछि मुस्ताङस्थित कोरला नाकालाई वैकल्पिक भन्सार कार्यालयका रुपमा सञ्चालनमा ल्याइने भएको छ । भन्सार विभागले कोरलाबाट पैठारी हुने वस्तुहरु काठमाडौँस्थित चोभार सुख्खा बन्दरगाहमा ल्याएर जाँचपास गर्न सकिने सुविधा दिएको हो छ ।
विभागका अनुसार अब कोरला भन्सार कार्यालयमा पैठारीका लागि आएका वस्तुलाई त्यहाँ जाँचपास नगरी आन्तरिक परिवहन सुविधामार्फत चोभार ल्याउन सकिने छ । यसका लागि भन्सार विभागले सडक मार्गको रुट पनि तोकेको छ ।
यस अनुसार अब मालवाहक सवारीसाधनका लागि कोरला नाका–नेचुङ (भन्सार)–छुसाङ–कागबेनी–जोमसोम–बेनी–कुश्मा–पोखरा–दमौली–मुग्लिन–कुरिनटार–नौबिसे–कलङ्की–चोभार सुख्खा बन्दरगाह भन्सार कार्यालयसम्मको रुट भएको विभागले जनाएको छ ।
यो मुख्य रुटमा समस्या आएमा मालवाहक सवारीका लागि मुग्लिङ–नारायणघाट–हेटौंडा–भैंसे–नौबिसे– कलङ्की–चोभार सुक्खा बन्दरगाह सम्मको वैकल्पिक बाटो पनि तोकिएको छ ।
मुस्ताङलेखि गुडाएरै ल्याइने नयाँ सवारी साधनले पनि विभागले तोकेको रुट प्रयोग गर्नुपर्नेछ । यसका लागि विभागले कोरला नाका–नेचुङ–छुसाङ–कागबेनी–जोमसोम–बेनी–कुश्मा–पोखरा–दमौली–मुग्लिन–नारायणगढ–हेटौंडा–भैंसे–फर्पिङ हुँदै चोभार सुख्खा बन्दरगाहको रुट तोकेका छ ।
