नेपाल पर्यटन बोर्डले आन्तरिक तथा अन्तर्राष्ट्रिय हवाई यात्रुहरूका लागि निःशुल्क सटल बस सेवा सञ्चालन गरेको छ । निर्वाचनलाई लक्षित गर्दै बोर्डले त्रिभुवन अन्तर्राष्ट्रिय विमानस्थल आवतजावत गर्ने यात्रुहरूका लागि सटल बस सेवा सञ्चालनमा ल्याएको हो ।
विमानस्थलदेखि काठमाडौँ उपत्यकाका होटल तथा मुख्य पर्यटकीय स्थानसम्म सटल बस सेवा उपलब्ध गराइएको बोर्डले जनाएको छ । उक्त सेवा आज बिहान ५ बजेदेखि सुरु गरिएको छ र साँझ ७ बजेसम्म कायम रहने बोर्डले जनाएको छ ।
बोर्डले यसका लागि २ वटा रुट तय गरेको छ । यस अन्तर्गत नेपाल वायुसेवा निगम, न्युरोड, कान्तिपथ, ठमेल, लैनचौर, मल्ल होटल, नयाँबजार, शंकर होटल, र्याडिसन होटल, दरबारमार्ग, याक एन्ड यती होटल, नागपोखरी, गौशाला र द्वारिका होटल हुँदै बस विमानस्थल पुग्नेछ । यस रुटको समन्वय रामबहादुर नगरकोटीले गर्नेछन् भने बा १ प १३७८ नम्बरको बस उपलब्ध छ ।
महाराजगञ्ज चोक, नारायणथान, रामडा होटल, मक्र्योर होटल, चाबहिल, हायात रीजेन्सी होटल, जोरपाटी र गौशाला हुँदै विमानस्थलसम्म अर्को बस सञ्चालनमा छ । यस रुटको समन्वय पवन गिरीले गरिरहेका छन् भने बा १ प १३२० नम्बरको बस उपलब्ध छ ।
अर्को रुट अन्तर्गत कुपण्डोल, हिमालयन होटल, त्रिपुरेश्वर, कलंकी, सोल्टी होटल, एकान्तकुना, सातदोबाटो, ग्वार्कोको रोयल टुलिप, तीनकुने, नयाँ बानेश्वर, एभरेष्ट होटल हुँदै बस विमानस्थलसम्म पुग्नेछ । यस रुटमा बा १ प १०८१ नम्बरको बस सञ्चालनमा छ ।
