नेपाल पर्यटन बोर्ड र चलचित्र विकास बोर्डबीच नेपाललाई ‘अन्तर्राष्ट्रिय फिल्म छायांकन गन्तव्य’ बनाउने उदेश्यले समझदारी भएको छ । दुइ बोर्डबीच समझदारी पत्रमा हस्ताक्षर भएको हो ।
समझदारी पत्रमा पर्यटन बोर्डका प्रमुख कार्यकारी अधिकृत दीपकराज जोशी र चलचित्र विकास बोर्डका अध्यक्ष दिनेश डीसीले हस्ताक्षर गरेका छन् ।
नेपाललाई अन्तर्राष्ट्रिय फिल्म छायांकन गन्तव्यका रुपमा विकास गर्ने, फिल्म पर्यटन प्रवर्धन गर्ने, अन्तर्राष्ट्रिय फिल्म महोत्सवमा नेपालको सहभागिता सुनिश्चित गर्ने गरी समझदारी भएको हो ।
सम्झौताअनुसार सन् २०२६ मा हुने कान्स फिल्म फेस्टिभलमा सहभागिता, पोखरामा फिल्म फेस्टिभल आयोजना, अडियो–भिजुअल स्टोरीटेलिङ अभियान सञ्चालन तथा चलचित्र पर्यटनसम्बन्धी प्रवद्र्धनात्मक सामग्री उत्पादन गर्ने विषय पनि समावेश छन् ।
