पर्वतको कुस्मास्थित ‘द क्लिफ’मा नेपाल प्रहरीको प्रहरी विशेष कला तथा कारबाही (कमाण्डो)का प्रशिक्षार्थीले बञ्जी जम्प गरेका छन् । तालिम संयोजक प्रहरी नायब उपरीक्षक गणेशबहादुर बरालको संयोजनमा द क्लिफमा प्रहरीलाई बञ्जी जम्प गराइएको हो ।
महाविद्यालयका प्राचार्य प्रहरी वरिष्ठ उपरीक्षक दीपशमशेर जबराका अनुसार जस्तोसुकै अवस्थाका लागि कमाण्डो फोर्सलाई तयार गर्न साहसिक गतिविधिमा संलग्न गराइएको हो । उनका अनुसार १०६ जना प्रशिक्षार्थी प्रहरीले बन्जी जम्प गरेका हुन् ।
यसअघि सशस्त्र प्रहरी, नेपाली सेना र नेपाल प्रहरीले तालिमका क्रममा द क्लिफमा बञ्जी जम्प गरिसकेका छन् । द क्लिफका अध्यक्ष राजु कार्कीले आगामी दिनमा पनि सुरक्षा निकायसँगको सहकार्य जारी रहने बताएका छन् ।
कालीगण्डकी नदीको खोँचमाथि द क्लिफमार्फत विश्वकै अग्लो स्वीङ र विश्वकै दोस्रो अग्लो बञ्जी जम्प सञ्चालन हुँदै आएको छ। बन्जी र स्वीङसँगै क्लिफमा रिसोर्ट पनि छ । क्लिफमा विश्वकै अग्लो व्यवसायिक स्काइ साइक्लिङ, मेगा ट्रोल, स्काइ क्याफे, वाल क्लाइम्बिङ, गुलेली पिङ, क्रेजी ब्रीज, स्काइ ग्लाइडिङ, स्काइ चियर लगायतका साहसिक खेल सञ्चालनमा छन् ।
