कामना सेवा विकास बैंकले चालु आर्थिक वर्षको तेस्रो त्रैमाससम्मको अपरिष्कृत वित्तीय विवरण सार्वजनिक गरेको छ । बैंकले सार्वजनिक गरेको विवरण अनुसार बैंकको खुद नाफा गत आर्थिक वर्षको तेस्रो त्रैमासको तुलनामा बढेको छ ।
चालु आर्थिक वर्षको चैत मसान्तसम्म बैंकले ५८ करोड ८६ लाख रुपैयाँ खुद नाफा कमाएको छ । गत आर्थिक वर्षको यो अवधिमा बैंकले ४९ करोड ३१ लाख रुपैयाँ खुद नाफा कमाएको थियो ।
समीक्षा अवधिमा बैंकको खुद ब्याज आम्दानी ९.२६ प्रतिशत बढेको छ भने खुद फि तथा कमिशन आम्दानी ९.६० प्रतिशतले वृद्धि भएको छ । बैंकको कुल सञ्चालन आम्दानी ८.४४ प्रतिशत र सञ्चालन मुनाफा १८.३४ प्रतिशतले बढेको छ ।
चैत मसान्तसम्ममा बैंकको वितरणयोग्य मुनाफा भने १६.४६ प्रतिशत घटेको छ ।
समीक्षा अवधिमा बैंकको प्रतिशेयर आम्दानी १.५९ रुपैयाँ बढेर २०.३२ रुपैयाँ पुगेको छ । चैत मसान्तसम्ममा बैंकको मूल्य आम्दानी अनुपात २४.२ गुणा र प्रतिशेयर नेटवर्थ १६३.५७ रुपैयाँ रहेको छ ।
४ अर्ब २१ करोड १९ लाख रुपैयाँ चुक्ता पूँजी रहेको कामना सेवा विकास बैंकको जगेडा कोषमा २ अर्ब ४५ करोड रुपैयाँ सञ्चित छ । बैंकले तेस्रो त्रैमासको अन्त्यसम्ममा ६४ अर्ब ९५ करोड ७ लाख रुपैयाँ निक्षेप संकलन गरी ५३ अर्ब ५३ करोड ८६ लाख रुपैयाँ कर्जा प्रवाह गरेको छ ।
